Almatylyq 22 jastaǵy jigit 51 adamdy aldap, jurttyń 4 mln teńgesin qaltasyna basqan

PETROPAVL. QazAqparat – Soltústik Qazaqstan oblysynyń polıtseıleri birneshe ınternet-alaıaqtyq jasaǵan Almaty qalasynyń 22 jastaǵy turǵynyn ustady. Tergeý barysynda onyń 51 adamdy aldap, 4 mln teńgeni jymqyrǵany anyqtaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, jyldyń basynda ınternette tapsyryspen jıhaz jasaımyn degen habarlandyrý paıda bolǵan. Petropavldyń úsh turǵyny da ol boıynsha habarlasyp, aldyn ala tólem jasaǵan. Keıin baılanys úzilip, qala turǵyndaryna polıtsııaǵa aryzdanýdan basqa amal qalmaǵan.

Oblystyq polıtsııanyń jedel ýákilderi tergeý barysynda osy fakti boıynsha 51 epızodty anyqtaǵan. Alaıaqtyq qarmaǵyna elimizdiń birneshe óńiriniń turǵyndary ilikken. Qazaqstandyqtar qaskóıge 4 mln-ǵa jýyq teńge aýdarǵan.

QR Qylmystyq kodeksiniń «Alaıaqtyq» baby boıynsha sot ony 4 jyl 8 aıǵa bas bostandyǵynan aıyrýǵa úkim shyǵardy, al buryn jasaǵan múliktik qylmys úshin jazanyń ótelmegen bóligin eskere otyryp sońǵy úkim 6 jyl 4 aıdy qurady.

«Jyl basynan SQO-da 649 ınternet-alaıaqtyq faktisi tirkeldi. Sonyń ishinde 250-den astamy ınternet arqyly taýarlar men qyzmetterdi satýmen baılanysty. Satýshynyń adaldyǵyna júz paıyz kóz jetkizbeıinshe, aldyn ala tólem jasamaýdy suraımyz», - deıdi SQO PD bastyǵynyń orynbasary Rýslan Nazarov.