Almatylyq 200 muǵalim destrýktıvti dinı ıdeologııaǵa qarsy ımmýnıtetti qalyptastyrý boıynsha dáris tyńdady

ALMATY. QazAqparat- Almatyda «The best center of all levels» QQ men Almaty qalasy Qoǵamdyq damý basqarmasy «Bilim berý uıymdary arasynda dástúrli qundylyqtardy nasıhattaý boıynsha jeke jáne toptyq aldyn alý is-sharalaryn ótkizý» jobasyn júzege asyrýda, dep habarlaıdy QazAqparat tilshisi.

Jobanyń maqsaty – mektep jáne kolledj ustazdaryna destrýktıvti dinı ıdeologııaǵa qarsy ımmýnıtetti qalyptastyrý jáne qazaq halqynyń dástúrli qundylyqtaryn dáripteý bolyp tabylady.

Semınarǵa 95 bilim berý mekemesiniń 200-ge jýyq qyzmetkeri qatysty. Ustazdar destrýktıvti dinı aǵymnyń yqpalyndaǵy bilim alýshylardy dástúrli dinı baǵytqa qaıtarý, qazaq halqynyń salt-dástúrin, ádet-ǵurpyn jáne rýhanı mádenıetin nasıhattaý, jastardyń otanyna degen patrıottyq sezimderin jáne bilim salasyndaǵy zańnamanyń talaptaryn saqtaý deńgeıin joǵarylatý boıynsha dáris tyńdady.

Dáristi ál-Farabı atyndaǵy QazUÝ professory, fılosofııa ǵylymdarynyń doktory, dintanýshi Aınur Dúrbeleńqyzy oqydy. Onyń aıtýynsha, mundaı semınar-trenıngter ekstremızm men terrorızmniń aldyn alýǵa jáne jastardy jat aǵymdardan saqtaýǵa óz septigin tıgizedi.

«Ulttyq qundylyqtardy balanyń boıyna jastaıynan sińirý qajet. Bul jerde bilim berý mekemeleriniń sonyń ishinde ustazdardyń róli zor. Qazir jat aǵymdardyń ókilderi jastardyń sanasyn ýlap jatyr. Oǵan qarsy shyǵýdyń birden bir joly balalardyń boıyna rýhanı mádenıetti barynsha qalyptastyrý qajet. Búgin biz osy jáne ózgede taqyryptardy ortaǵa salyp talqylap jatyrmyz»,- deıdi fılologııa ǵylymdarynyń doktory Aınur Dúrbeleńqyzy.

Semınarǵa jınalǵandar dinı saladaǵy memlekettik saıasattyń róli men radıkaldy ıdeologııaǵa qarsy ımmýnıtetti qalyptastyrý boıynsha ózara pikir almasty.

Shara sońyna semınarǵa qatysqandarǵa «The best center of all levels» qoǵamdyq qorynyń arnaıy sertıfıkaty tabystaldy.