Almatylyq 200 búldirshin Elbasy atynan jańajyldyq syılyqtar aldy
ALMATY. QazAqparat - Almatydaǵy Respýblıka saraıynda Qazaqstan Prezıdenti atynan uıymdastyrylǵan Jańa jyl shyrshasy merekesi ótip, oǵan balalar úıi men ata-ana qomqorlyǵynsyz qalǵan 200 búldirshin qatysty, dep habarlady «QazAqparat» HAA tilishisi.
Jańa jyl shyrshasynda Memleket basshysy balalardy beınehabarlama arqyly quttyqtady.
«Qurmetti balalar, eń qyzyqty mereke - Jańa jyl jaqyndap keledi. Esik aldynda qys. Biraq, bizdiń úılerimizde jyly ári jaıly. Elimizdiń qalalary men aýyldary jańajyldyq shyrshalardy bezendirýde. Shyrsha túbinen balalar kóp kútken syılyqtaryn izdeıdi. Eń bastysy, tek osy kúni ǵana emes, jyl boıy bir-birińniń qolynan ustap, árqashan kómek qolyn sozýǵa daıyn bolyńdar. Barlyq halyq - ol úlken otbasy. Jańa jyl kezinde bizder - úlkender de ǵajaıypqa senemiz. Tynymsyz eńbek, birlik jáne otanǵa degen mahabbat kez kelgen armandy júzege asyra alady. Bilemin, senderdiń barlyǵyń da osy merekege laıyqsyńdar», - dedi Elbasy balalarǵa.
Bul quttyqtaýǵa qala ákimi Baýyrjan Baıbek te qosyldy.
«3 myń bala sekildi búgin Almatynyń 200 búldirshini Prezıdent atynan quttyqtaý aldy. Men senderge baqyt tileımin. Eń bastysy, bul ómirde qoryqpaı, óz kúshterińe senińder. Oqý eń mańyzdysy. Bilim senderdi bıik belesterge shyǵarady, bolashaqta óz jemisin beredi», - dedi Baýyrjan Baıbek.
Jańa jyl merekesinde qazaqstandyq ártister ertegi qaharmandaryn beınelegen tamasha kontserttik baǵdarlama usyndy. Sahnada RinGO toby, kloýn Murat Mutyrǵanov syndy ónerpazdar óner kórsetti.
Merekeniń kishkentaı qonaqtaryna «tátti» dastarhan jaıylyp, Elbasy atynan syılyqqa toly sandyq tabystaldy. Onyń ishinde sport kıimderi, oqý qural-jabdyqtary, arqa qorjyndary men uıaly telefondar bar.
