Almatylyq 10 mınýtta qomaqty aqsha salynǵan seıfti urlap ketti
ALMATY. QazAqparat – Almatyda 37 jastaǵy er adam ǵalamtor-dúkenniń keńsesinen 16 mln teńge salynǵan seıfti urlap ketti, dep habarlaıdy QazAqparat tilshisi.
Polıtsııa departamentiniń habarlaýynsha, ury qylmystyq josparyn nebári 10 mınýt ishinde júzege asyrǵan. 1983 jyly týǵan M.esimdi azamat tańǵy saǵat 05:00 shamasynda keńseniń kireberisindegi esikttiń qulpysyn syndyryp, ishke kirip, sol jerden kishkene ólshemdi temir seıfti alyp ketken.
«Osy qylmysty ashý úshin arnaıy tergeý-jedel toby quryldy, qyzmetkerler kúdiktini anyqtady. Qylmysty der kezinde ashýǵa beınebaqylaý kameralarynyń kómegi tıdi. Kúdikti ustalyp, qamaýǵa alyndy. Qazirgi ýaqytta urlanǵan qarajatty saqtaý ornyn anyqtaýǵa baǵyttalǵan sharalar kesheni júrgizilýde, olar keıinnen QR QK-niń 188 baby boıynsha qaralatyn qylmystyq is materıaldaryna tirkeledi, – dedi Bostandyq aýdandyq PB janyndaǵy polıtsııa bóliminiń bastyǵy Ǵalym Qasymbaev.
