Almatyǵa jetkiziletin 200 avtobýs nelikten keshiktirilgen
ALMATY. QazAqparat - «Almatyelektrotrans» JShS basshylyǵy baspasóz máslıhatyn ótkizdi, onda Almatyǵa jetkiziletin 200 qoǵamdyq kóliktiń nelikten keshiktirilip jatqany túsindirildi, dep habarlaıdy QazAqparat tilshisi.
Kezdesýge osy avtobýstardy jetkizýge arnalǵan tenderdi jeńip alǵan «Optıma» JShS basshylyǵy qatysty. Kelisimshart boıynsha jetkizý merzimi: 50 avtobýs - 2019 jyldyń 30 maýsymy; 150 avtobýs - 10 shilde dep kórsetilgen.
«Shynynda da, biz avtobýstardy kórsetilgen merzimge deıin jetkizýmiz kerek bolǵan. Maýsym aıynda kishkene ýaqyt berýdi suradyq. Sebebi, biz osy tehnıkamen kelisken jabdyqty premıým klasynda usyndyq. Qoǵamdyq kóliktiń keıbir bólshekteri, ıaǵnı qoraby, amerıkalyq bolyp shyqty. Al, avtobýstarda qoldanylatyn gaz jabdyqtary nemistiki. Amerıkalyq komponentterge qatysty suraqtarymyz boldy. Qujattardy usyný jáne qosalqy bólshekterdi jetkizý merzimderi jabdyqtaýshylarmen shegerildi. Osyǵan baılanysty bizde Eýrazııalyq odaq aýmaǵynda paıdalaný jáne kirýge ruqsat etilgen kólik quralynyń túrin maquldaý týraly kýálik alý máselesi qozǵaldy. Buǵan bizdiń Qytaıdaǵy seriktes Zhong Tong kompanııasy jaýap beredi. Olar Máskeýde ornalasqan sertıfıkattaý ortalyǵyn tańdady. Búgin sertıfıkattaý rásimi aıaqtalýǵa jaqyn. Biz avtobýstardy synaqtan ótkizdik», - dedi «Optıma» JShS ókili.
«Optıma» JShS basshylyǵy qyrkúıektiń ortasyna qaraı 50 avtobýs keledi dep sendirdi. Al qazan aıynda qalǵan 150 avtobýs Almatyǵa jetkiziletin bolady.
Sonymen birge, «Almatyelektrotrans» JShS basshysy Ǵanı Tájıev alǵashqy 50 avtobýs Qorǵasta turǵanyn aıtty. Qujattardy rásimdeý aıaqtalǵannan keıin Almatyǵa jetkiziledi. Budan bólek, taǵy 60 avtobýs lızıng arqyly alynady. Zhong Tong kompanııasy Almatyda avtobýstarǵa qyzmet kórsetý ortalyǵyn ashady.
