Almatyǵa jańadan qosylǵan 1330 gektar jer aýmaǵyna aýyldar kirmeıdi
ALMATY. 18 mamyr. QazAqparat /Erlik Erjanuly/ - Almaty qalasynyń aýmaǵy 1330,25 gektarǵa ulǵaıdy. Almaty oblysynyń Qarasaı, Іle jáne Talǵar aýdanyna qarasty bul aýmaqta aýyldar joq.
Bul jaıynda Almaty qalalyq jer qatynastary basqarmasy bastyǵynyń orynbasary Aman Ábdirahmanov búgin Almatyda ótken baspasóz máslıhatynda aıtty.
"Almatyǵa qosylǵan jer aýmaǵynyń 823, 82 gektary - Qarasaı, 496,92 gektary - Talǵar, 9,51 gektary - Іle aýdandaryna qarasty jerler. Al jer telimderiniń jalpy sany - 12. Olar jol aıryǵy, ıntellektýaldy mektep, №171 jalpy bilim beretin mektep, Verıgına taýy shyńyndaǵy meshit, halyqaralyq áýejaı, "Merkýr-grad" turǵyn úı kesheni, "Jetisý" bazary, avtojoldar men sýmen jáne elektrmen qamtamasyz etetin dáliz", - deıdi Aman Ábdirahmanov.
Onyń aıtýynsha, Almaty aýmaǵyn ulǵaıtýǵa daıyndyq 2010 jyly bastalǵan. Qalalyq máslıhat sheshimimen Úkimetke usynys jasalyp, 12 mamyrda Elbasynyń "Almaty qalasynyń shekarasyn ózgertý týraly" №77 Jarlyǵy shyǵyp, ol 18 mamyrda jarııalandy. Jalpy qala aýmaǵy buǵan deıin sońǵy ret 2003 jyly ulǵaıtylǵan bolatyn.
