Almatyǵa Úndistannan 34 tonna medıtsınalyq júk jetkizildi
ALMATY. QazAqparat - Búgin Almatyǵa Delıden 34 tonna nemese 1,6 mıllıon qaptamadaǵy koronavırýsqa qarsy preparattar jetkizildi, dep habarlaıdy QazAqparat tilshisi.
Bul dáriler Almaty ákimdiginiń dári-dármekterdiń turaqtylyq qoryn qurýǵa bólgen qarjy esebinen satyp alyndy.
Eske salsaq, maýsym aıynyń sońynda dári-dármek tapshylyǵyn joıý maqsatynda Almaty ákimi Baqytjan Saǵyntaevtyń sheshimi boıynsha, koronavırýsqa qarsy preparattardy kóterme baǵada satyp alý úshin paıyzsyz qarjylandyrýǵa 5 mlrd teńge bólingen edi. Budan ózge, kovıdti statsıonarlardy dári-dármek preparattarymen qamtamasyz etý maqsatynda rezervtik qor qurý úshin taǵy 5 mlrd teńge bólindi. Qazirgi kezde preparattardyń jartyjyldyq qoryn jasaý boıynsha belsendi jumystar júrip jatyr. Al bul dári-dármekterdiń tapshylyǵyn joıyp, olardyń dárihanalar men ınfektsııalyq statsıonarlarǵa irkilissiz jetkizilýin qamtamasyz etedi.
Búgin jetkizilgen dári-dármekter partııasynda antıkoagýlıant, enaksoparın, geparın; antıbakterıaldy - ofloksatsın; qabynýǵa qarsy preparattar - prednızalon, deksametazon; antıbıotıkter – tseftrıakson, meropenem; qyzýdy túsiretin - paratsetamol; vırýsqa qarsy preparat - oseltamıvır bar.
«Ótken jumadan bastap dári-dármekterge degen suranystyń tómendegeni, uzaq kezektiń azaıǵany baıqalady. Jalpy, jaǵdaı ońalýda. Turaqtylyq qory arqyly dárihanalarǵa preparattardy jetkizýmen qatar, biz kovıdti gospıtalderdi dári-dármektermen jedel qamtamasyz etý úshin rezervtik qordy jasaýdamyz. Dári-dármekterdiń jartyjyldyq qory farmkompanııalardyń qoımalarynda saqtalady, qajet bolǵan kezde bul preparattar statsıonarlarǵa bólinedi», - dep habarlady Almaty ákimdiginiń qalany dári-dármek preparattarymen qamtamasyz etý jónindegi úılestirýshisi Zańǵar Sálimbaev.
Onyń málimdeýi boıynsha, Almatyǵa 23 shildede Túrkııadan «Kleksan» preparaty jetkiziledi. Jetkizýshi bul preparattyń shamamen 40 myń birligin ákeletin bolady. 31 shildege deıin qosymsha taǵy 150 myń birliktegi kleksan jetkizý josparlanǵan. Jalpy, aldaǵy aptada antıkogýlıanttyń shamamen 300 myńǵa jýyq birligi jetkiziledi.
Bul – qalaǵa 10 shildeden bastap qajetti dári-dármekterdi jetkizgen jetinshi reıs. Osy aıdyń sońyna deıin taǵy eki reıs keledi dep kútilýde. Qalaǵa shamamen 7,5 mln qaptama dári dármek jetkizilgen. Kedendik rásimdeýden soń preparattar qala dárihanalaryna bólinetin bolady.
Qala ákimdigi tarapynan dári-dármek júkteriniń jedel rásimdelýi úshin pármendi sharalar júzege asýda. MKD-niń Almaty qalasy boıynsha «Jetisý» Keden postysynyń basshysy Talǵat Jańbyrbaev elimizge kelip jetken medıtsınalyq zattary bar gýmanıtarlyq jáne kommertsııalyq júkterdi rásimdeý ýaqytynyń edáýir qysqarǵanyn atap ótti.
«Gýmanıtarlyq júkter kedendik tólemdersiz, tez arada rásimdelýde. Rásimdeý ýaqyty 5-10 mınýt. Farmkompanııalardyń kommertsııalyq partııalaryn rásimdeýge 10-20 mınýt ketedi. Aıta keterligi, biz qazir táýlik boıyna jumys isteý rejımine kóshtik. Buryn túnde kelgen júk tańerteńgisin rásimdeletin. Biz qazir kelgen júkti der kezinde rásimdep, kúndiz de, túnde de damyl tappaı, jumys jasaýdamyz. Biz únemi baılanystamyz, óıtkeni ómirlik mańyzy bar júk bir mınýtqa da keshikpeýi tıis», - dedi T. Jańbyrbaev.
