Almatyǵa Túrkııanyń eks-prezıdenti Abdýlla Gúl keldi
Shara barysynda sóz sóılegen Janseıit Túımebaev qurmetti meımanǵa ýnıversıtetke kelgeni úshin alǵys aıtyp, Qazaqstan men Túrkııanyń kópjyldyq jemisti yntymaqtastyǵynyń mańyzdylyǵyn atap ótti.
«Qazaqstan men Túrkııa – baýyrlas memleket. Eki eldiń qarym-qatynasy táýelsizdikke deıin bastalǵan. Qazaqstan egemendigin alǵanda alǵash quttyqtap, dostyq nıetin jetkizgen Túrkııa memleketi bolatyn. 1992 jyly Qazaqstan men Túrkııa memleketteri resmı túrde dıplomatııalyq qarym-qatynas ornatty. Sondyqtan biz úshin Táýelsizdiktiń 30 jyldyǵyna oraı jáne aldaǵy eki el yntymaqtastyǵynyń 30 jyldyǵy aıasynda Túrkııa Respýblıkasynyń 11-shi Prezıdenti Abdýlla Gúl myrzanyń ýnıversıtetimizge kelgeni aıryqsha mártebe», – dedi ýnıversıtet rektory.
Qazaqstanǵa jumys saparymen kelgen Túrkııanyń eks-prezıdenti Abdýlla Gúl Qazaqstan Táýelsizdiginiń 30 jyldyǵymen quttyqtap, ystyq lebizin bildirdi. Sondaı-aq qurmetti meıman Qazaqstandy damytýdaǵy Elbasy Nursultan Nazarbaevtyń eleýli rólin aıryqsha atap ótti.
«Qazaqstan – bizdiń atajurtymyz. Barshańyzdy Táýelsizdiktiń 30 jyldyǵymen quttyqtaımyn! Qazaqstannyń jetistikterin biz QR Tuńǵysh Prezıdenti Nursultan Nazarbaevtyń esimimen tyǵyz baılanystyramyz. Búginde elderińiz álemdik qoǵamdastyqta laıyqty oryn alyp otyr. Bul Nursultan Ábishulynyń úlken eńbegi. Ol halyq pen eldiń ıgiligi úshin kóptegen sharalardy uıymdastyryp, Qazaqstandy jańa deńgeıge kóterdi. Búginde Ult kóshbasshysynyń sara jolyn Memleket basshysy Qasym-Jomart Kemeluly Toqaev abyroımen jalǵastyryp keledi», – dedi Abdýlla Gúl.
Kezdesý barysynda Abdýlla Gúl jınalǵandarǵa dáris oqydy. Sonymen qatar Túrkııanyń qoǵam qaıratkeri óziniń saıası saladaǵy kópjyldyq tájirıbesimen bólisip, qatysýshylardyń suraqtaryna jaýap berdi.
Shara sońynda Abdýlla Gúlge Ál-Farabı atyndaǵy Qazaq ulttyq ýnıversıtetiniń «Qurmetti professory» ataǵy berildi. Sondaı-aq ýnıversıtet rektory Janseıit Túımebaev meımandy «Ál-Farabı» altyn medalimen marapattady.
Eske sala keteıik, Abdýlla Gúl 2002-2003 jyldar aralyǵynda Túrkııanyń premer-mınıstri, keıin premer-mınıstrdiń kómekshisi, shetel isteri mınıstri qyzmetin abyroımen atqarǵan. Al 2007-2014 jyldar aralyǵynda Túrkııanyń Prezıdenti boldy
