Almatyǵa Túrkııadan dárigerler shaqyrtylyp jatyr
ALMATY. QazAqparat – Almatydaǵy koronavırýs juqtyrǵandardy emdeý úshin Túrkııadan dáriger shaqyrtylyp jatyr. Bul týraly qala ákimi Baqytjan Saǵyntaev Almaty telearnasynda Akimat Live tikeleı efırinde aıtty, dep habarlaıdy QazAqparat tilshisi.
Onyń aıtýynsha, ákimdikke RAMS Qazaqstan túrik kompanııasy osyndaı usynys jasaǵan.
«Almatyda olardyń 2 qonaq úıi bar eken. Eger olarǵa ruqsat berip, lıtsenzııa rásimdesek 1 qazanǵa deıin eki qonaq úıdi koronavırýs naýqastaryn emdeıtin statsıonarǵa aınaldyrýdy josparlap otyr. Keshe kelisim jasaldy. 2 qonaq úıde 250 oryndyq aýrýhana ashylady. Ol jerde qajetti qural-jabdyqtyń bári bolady. Túrik dárigerleri jumys isteıtin bolady», - dedi Baqytjan Saǵyntaev.
Aıta keteıik, qalada qosymsha tósek-oryndar jasaqtaý, qalanyń barlyq kadrlyq rezervin jumyldyrý jumystary júrgizilýde. Búgingi tańda pandemııamen kúrestegi aldyńǵy shepke 4 464 medıtsına qyzmetkeri (2 681 dáriger men orta medıtsına mamany) jumyldyryldy. 1 526 mamannan (dárigerler – 246, orta qyzmetkerler – 1009, kishi medıtsınalyq qyzmetkerler jáne basqalary – 145, volonterler – 106) kadrlyq rezerv jasaqtaldy. Barlyǵy 328 adam jumysqa ornalastyryldy (onyń ishinde 96 dáriger, 160 orta medıtsına qyzmetkeri, 72 kishi medıtsına qyzmetkeri jáne basqalar).
