Almatyǵa túnde jasyryn ótpek boldym – qamaýǵa alynǵan azamat
TALDYQORǴAN.QazAqparat – Almaty oblysynda tótenshe jaǵdaı rejıminiń talaptaryn buzǵan 27 adam qamaýǵa alyndy, dep habarlaıdy QazAqparat tilshisi.
«Men Aşybulaq aýylynanmyn. Túnde jasyryn túrde Almaty qalasyna ótip ketkim keldi. Polıtsııa qyzmetkerleri ustap alyp, sot 10 kúnge qamaý týraly sheshim shyǵardy. Meniń qateligimdi qaıtalamaýlaryńyzdy suraımyn. Karantın ýaqytynda úılerińizde otyryńyzdar», - dedi ákimshilik qamaýǵa alynǵandardyń biri.
Oblys turǵyndary tótenshe jaǵdaı talabyn buzǵany úshin osylaısha ókinish bildirýde.
«Shekaradan ótip ketkenimdi bilmedim. Sol úshin ustalyp, 10 kúnge qamaqqa alyndym. Barlyq azamattardy karantın tártibin qatań saqtaýǵa, qajettilik bolmasa, dalaǵa shyqpaýǵa shaqyramyn. Múmkin bolsa, úılerińizde otyryńyzdar. Ózderińizdi jáne jaqyndaryńyzdyń densaýlyǵyn qaterge tikpeńizder»,- dedi Almaty oblysynyń kelesi turǵyny.
Óńirdiń tártip saqshylary taratqan aqparat boıynsha, sot sheshimimen ákimshilik qamaqqa alynǵan 27 azamat qazirgi ýaqytta ýaqytsha ustaý ızolıatorynda jazasyn óteýde.
Barlyǵy 38 adam ákimshilik jaýapkershilikke tartyldy. Olardyń 27-si qamaýǵa alynsa, qalǵany kem degende 10 AEK kóleminde aıyppul tóleýge mindetteldi.
