Almatyǵa Tájikstannan kelgen jeke tasymaldaýshynyń jolaýshysynan «TT» jaýyngerlik tapanshasy tabyldy
ALMATY. 19 qyrkúıek. QazAqparat - «Toıota Kamrı» kóliginiń júrgizýshisi, 21 jastaǵy Tajikstan azamaty «Boran-051» patrýldik kóligin kóre salyp, kópe-kórneý sasqalaqtaı bastaıdy.
Polıtseıler muny baıqap, júrgizýshi men onyń qasyndaǵysyn tekserýge sheshim qabyldaǵan, dep habarlaıdy qalalyq ІІD baspasóz qyzmeti.
«Júrgizýshi basqa eldiń azamaty bolyp shyqty. Ol adamda bir aılyq ýaqytsha tirkeý bolǵan, alaıda qandaı da bir eńbek túrimen aınalysý ruqsaty joq eken. Al odan góri joldasynyń málimetteri qyzyǵyraq bolyp shyqty. Qaraǵandydan kelgen 24 jastaǵy azamatta oqshantaıynda 6 oǵy bar «TT» markaly tapanshasy bar eken. Bul adamnyń burynyraqta qasaqana denege aýyr jaraqan salǵany jáne tonaý úshin jazasyn ótegendigi belgili boldy. E. esimdi azamat bul tapanshany bıylǵy sáýir aıynda Qaraǵandyda bireýmen tóbelesý kezinde tartyp alǵanyn aıtyp, aqtaldy. Bul sózderdiń qanshalyqty ras-ótirigi QR QK-niń 251 baby boıynsha bastalǵan tergeý barysynda anyqtalatyn bolady. Kúdikti qaraýylǵa alyndy», - dep málimdedi Bostandyq aýdany ІІB-daǵy bólim bastyǵy, podpolkovnık Rýslan Manapov.
Tergeýdiń alǵashqy saǵattarynda-aq Eset esimdi bul azamat birneshe aı buryn Qaraǵandyda adam óltirip, jergilikti polıtsııadan izin jasyrý úshin Almatyǵa kelgendigi anyqtaldy. Oǵan resmı túrde izdeý jarııalanǵan bolatyn.
«Tergeý jeke tasymaldaýshy men qylmysker arasynda eshqandaı baılanys joqtyǵyn dáleldedi. Alaıda, bul Qazaqstannyń kóshi-qon zańyn óreskel buzǵan sheteldik azamat jaýapqa tartylmaıdy degen sóz emes. Búgin ol ákimshilik jaýapkershilikke tartylý úshin sotqa shyqyrtylady, sot sheshimi boıynsha onyń elden shyǵarylýy múmkin», - dep qorytyndylady podpolkovnık Manapov.
