Almatyǵa Taıaý Shyǵystan týrıster kóptep kele bastady
«Almaty Taıaý Shyǵys elderinen kelgen kásipker týrıster men qarapaıym saıahatshylar arasynda úlken tanymaldylyqqa ıe bola bastady. Biz Omannan kelgen qonaqtardy qushaq jaıa qarsy alamyz, olardyń sapary jaǵymdy ári este qalarlyq bolatynyna senimdimiz. Qabyldanǵan sharalardyń arqasynda Almatyǵa týrıstik destınatsııa retinde qyzyǵýshylyq artyp keledi, biz bul jumysty jalǵastyryp jatyrmyz», – dedi Almaty qalasy týrızm basqarmasynyń basshysy Ǵalııa Toqseıitova.
Ol «Almaty-Maskat» baǵyty boıynsha jańa reısti ashýdyń maqsaty Qazaqstan men Omannyń týrıstik áleýetin damytý, eki eldiń arasyndaǵy saýda-ekonomıkalyq jáne mádenı baılanystardy nyǵaıtý ekenin aıtty.
Onyń sózinshe, týrızm basqarmasy Almaty qalasyn halyqaralyq naryqtarda belsendi túrde ilgeriletýde. Mysaly, Taıaý Shyǵys elderinen týrısterdi tartý úshin Katar, BAÁ, Saýd Arabııasy jáne Omannyń iri qalalary boıynsha roýd-shoý uıymdastyryldy. Byltyr Almaty týrızm basqarmasynyń ókilderi Dubai – Arabian Travel Market 2022 kórmesine qatysty.
Aıta keterligi, pandemııa toqtaǵan sátten bastap Almatyda týrıster kóbeıe bastady. 2022 jyly megapolıske kelgen árbir tórtinshi týrıst sheteldik. 2022 jyly Almatyda sheteldik týrıster sany 417 myń adamǵa jetti. Bıyl birinshi toqsanda qalaǵa basqa elderden 400 myńnan astam týrıst kelgen.
Búginde Almatydan álemniń kez kelgen jerine ushýǵa bolady. Ushý kestesinde 23 elge reıs bar. Atap aıtsaq, Reseı, Grýzııa, Ońtústik Koreıa, BAÁ, Ulybrıtanııa jáne t.b. Sheteldiń 38 qalasyna tikeleı reıster ashylǵan.
