Almatyǵa «Spýtnık V» ekinshi komponentiniń 36 myń dozasy jetkiziledi
ALMATY. QazAqparat - Almaty qalasynyń Qoǵamdyq densaýlyq saqtaý basqarmasy megapolıste koronavırýsqa qarsy qansha vaktsına qalǵanyn aıtty, dep habarlaıdy QazAqparat tilshisi.
Basqarma málimetinshe, qazir Almatyda «Spýtnık V» vaktsınasynyń ekinshi komponenti jetkilikti deńgeıde. Máselen, 4 transhtan – 446, 5 tarnshtan – 634, 6 transhtan – 2091, 7 transhtan – 7152 doza qalǵan.
«Qala boıynsha «Spýtnık V» vaktsınasynyń ekinshi komponenti №4 qalalyq emhanada, Mega oıyn-saýyq ortalyǵynda, №29 qalalyq emhanada jáne ózge de medıtsınalyq uıymdarda bar. Ekpe salý oryndarynda vaktsınanyń biri bitip qalsa, naýqas basqa vaktsına pýnktine jiberiledi»,- dep habarlady vedomstvadan.
Qala boıynsha kúnine 1200-3000 deıin adam vaktsınanyń 1 jáne 2-shi komponentin saldyrady. Basym kópshiligi vaktsınanyń 2-shi komponentin alyp jatyr. 2-shi komponenttiń qorda turǵan 13 688 dozasy 6-7 kúnge ǵana jetedi. Medıtsına ortalyǵynyń kópshiliginde 30-dan 300-ge deıin ǵana doza bar.
«45 serııa boıynsha sapa jáne qaýipsizdik sertıfıkaty ákelindi. Sondyqtan búginnen bastap «Spýtnık V» vaktsınasy ekinshi komponentiniń 36 myń dozasy Almatynyń ekpe oryndaryna jetkiziledi»,- dep túsindirdi basqarmadaǵylar.
