Almatyǵa shuǵyl qonǵan ushaq ekıpajy halyqaralyq talapqa saı áreket etkenderin aıtty
ALMATY. QazAqparat - «Air Astana» áýe kompanııasynyń ókilderi Astana-Almaty baǵyty boıynsha KS672 reısin oryndaý barysynda bir qozǵaltqyshy isten shyǵyp, shuǵyl qonýǵa májbúr bolǵan ushaqqa qatysty «QazAqparat» tilshisiniń suraqtaryna jaýap berdi.
«Áýe kompanııasynyń «Boıng - 757» ushaǵy 2017 jyldyń 7 naýryzynda Astana-Almaty baǵyty boıynsha KS672 reısin oryndaý barysynda shtattyq rejimde jerge qondy. Ekıpaj músheleri tehnıkalyq sebepterge baılanysty isten shyqqan sol jaqtaǵy qozǵaltqyshty sóndirdi», dedi áýe kompanııasynyń baspasóz qyzmetindegiler.
«Air Astana» kompanııasy ushaǵynyń ekıpaj músheleri halyqaralyq qaýipsizdik talaptary boıynsha áreket etkendikterin aıtty.
Qazirgi ýaqytta áýe kompanııasy jaǵdaıdyń mán-jaıyn anyqtaý jumystaryn júrgizip jatyr.
Ushaq bortynda 69 jolaýshy, 8 ekıpaj múshesi bolǵan.
Aıta keteıik, buǵan deıin «Air Astana» áýe kompanııasynyń KS672 reısin oryndaǵan ushaǵy Almaty halyqaralyq áýejaıynda shuǵyl túrde qonǵany habarlanǵan bolatyn.
