Almatyǵa shetelden kelgen 31 azamat eline qaıtaryldy
ALMATY. QazAqparat – Almaty ákimdigi shetelden kelgen ushaq jolaýshylarynyń arasyndaǵy koronavırýs kórsetkishi týraly aqparat jarııalady, dep habarlaıdy QazAqparat tilshisi.
«Byltyr qazannan bastap qańtarǵa deıin Almaty halyqaralyq áýejaıyna 109 724 jolaýshysy bar 773 reıs keldi. Onyń ishinde COVID-19 – ǵa teris nátıjesi bar anyqtamalarmen – 97430, anyqtamasyz 12294 adam kelgen. Onyń ishinde PTR-taldaýdy tapsyrǵannan keıin arnaıy karantın statsıonarynda 79 adamnyń nátıjesi belgili boldy (Túrkııadan kelgen jolaýshylar arasynda - 30 jaǵdaı, BAÁ-18 jaǵdaı, Egıpet – 23 jaǵdaı, Belarýs – 5, Ýkraına – 1, Maldıv araldarynan -2 jolaýshy). Qalanyń halyqaralyq áýejaıynda sanepıdbaqylaýdy kúsheıtý sharalary jalǵasýda. Sondaı-aq, anyqtamanyń joqtyǵynan 31 shetel azamaty keri qaıtaryldy», - dedi ákimdikten.
Mamandardyń aıtýynsha, álemde epıdemııalyq jaǵdaı ýshyǵa túsýde. Birqatar el ınfektsııany juqtyrý jaǵdaılarynyń ósýine jol bermeý úshin qosymsha sharalar engizip jatyr. Mysaly, Ońtústik Koreıa úkimeti áleýmettik qashyqtyq saqtaýdy taǵy eki aptaǵa uzartty. 15 aqpanǵa deıin azamattarǵa COVID-19 taralýynyń jalǵasýyna baılanysty shetelge saparlardy boldyrmaý nemese keıinge qaldyrýdy usynady. Jeksenbide Avstrııa Úkimeti Ulttyq karantındi 7 aqpanǵa deıin uzartatynyn jarııalady. Ulybrıtanııa 18 qańtardan 15 aqpanǵa deıin koronavırýstyń jańa shtamdarynyń ákelinýine jol bermeý úshin barlyq týrıstik dálizderdi jaýyp jatyr.
