Almatyǵa sel qaýpi joq - Almaty ákimi
ALMATY. Naýryzdyń 16-sy. QazAqparat /Erbol Azanbek/ - Búgin Almaty ákimi Ahmetjan Esimov Almaty oblysyndaǵy sý tasqynyna baılanysty qalalyq qyzmet basshylary men aýdan ákimderiniń keńesin ótkizdi,
dep habarlaıdy QazAqparat.
Almaty ákimi keńes barysynda Almaty oblysynyń ákimshiligine sý tasqyny zardaptaryn joıý úshin 100 mıllıon teńge materıaldyq kómek kórsetiletinin aıtty.Sonymen qatar ákim apparaty bir kúndik jalaqylaryn aýdarý týraly sheshim qabyldaǵan.Ahmetjan Esimov bunymen qatar aýdan ákimderi men basqarmalardyń ókilderine Almaty oblysyndaǵy áriptesterine kez-kelgen kómekti kórsetýdi tapsyrdy.
Otyrysta bunymen qatar Almatynyń da selden qorǵalý múmkindigi aıtyldy. Qala ákiminiń aıtýynsha, Almatyda sel bolý qaýpi joq. Áıtse de sońǵy kúnderi qalanyń arnaıy qyzmeti oblystaǵy jaǵdaıǵa baılanysty arnaýly rejımge kóshirilgen. Taýly aýmaqtarda «Qazseldenqorǵaý» qyzmetiniń baqylaý beketteri ornatylǵan. Kúndelikti geologııalyq jáne gıdrogeologııalyq monıtorıng júrgizilip otyrylady. Otyrysta Almaty qalalyq tótenshe jaǵdaılar basqarmasynyń bastyǵy Damır Halyqov alańdaýǵa esh negiz joqtyǵyna sendirdi.Otyrys barysynda qala ákiminiń orynbasary Máýlen Muqashevtiń tóraǵalyǵymen sel men sý qaýipsizdigin qamtamasyz etý úshin qalalyq shtab qurýdy tapsyrdy. Qala ákimi budan bólek, búgin tańerteń Almatyny selden qorǵaý sharalaryn ózi tekserip kórdi. Tótenshe jaǵdaılar shtabynyń ókilderimen birge tikushaqqa otyryp Almaty mańyndaǵy sel qaýpi bar aýmaqtardy sholyp shyqty. «Qazgıdromet» ókilderi aldaǵy kúnderi Almatyda aýa raıy 20 gradýstan astamǵa jylıtynyn aıtady. Búgingi qala ákiminiń reıdi kórsetkendeı, 2500 metr bıiktikte qar qalmaǵan. Bul óz kezeginde sel qaýpin týdyrady. Alaıda, otyrys barysynda aıtylǵandaı, Almaty tabıǵattyń barlyq tosyn jaǵdaıyna daıyn.
