Almatyǵa Qytaı júk kólikterinen keler zııan orasan bolyp tur
ASTANA. 21 qazan. QazAqparat - Almatynyń kirer jolynda 50-ge jýyq júk kóligi tekserilip, árbir ekinshi kólik artyq salmaq júk tıegen bolyp shyqty,
dep jazady «Almaty aqshamy» basylymy.
Árbir tirlikten paıda izdegen búgingi zamanda ortaq múdde, otan qamy tasada qalyp barady. Bir jaǵy Qytaı, kelesi kórshimiz Qyrǵyzstan bolyp turǵan Almaty oblysy búgingi «Jibek joly». Al, Almaty qalasy qaı kezde de saýda ortalyǵy bolǵan eń iri megapolıs. Shaharda elimizdiń eń kóp qurylys alańdary da shoǵyrlanǵan. Naryq zamanyndaǵy osynaý alyp qury lystar men saýda-sattyqty júrgizýge kerekti júk kóliginiń 90 paıyzy qytaılyq máshıneler búginde. Ári arzan, ári júk tasymaly otandyq máshınelerden 2-3 ese artyq qytaı tehnıkasy kásipkerler úshin tıimdi bolyp tur. Biraq, qytaılyqtyń aty - qytaılyq. Tehnıkalyq turǵyda esh kepildik joq. Jýyrda ǵana bolǵan qala ortasyndaǵy jan túrshigerlik jol apaty sózimizge dálel. Júrgizýshisi ıgere almaǵan alyp kólik birneshe almatylyqtyń ólimine sebep boldy.
Osydan 5-6 jyl buryn Dostyq dańǵyly jolyndaǵy avtobýs pen aıaldamany japyryp, birneshe adamdy o dúnıege jibergen de qytaılyq júk kóligi bolatyn. Taýly jerde ornalasqan Almatyǵa qytaılyq aýyr júk máshınelerin kirgizbeý týraly másele kóterilgen sol kezde. Biraq, ol aıaqsyz qaldy.
Jalpy, qalamyz aýyr qytaı júk kólikterinen tek qana zııan kelip tur. Birinshiden, tehnıkalyq jaǵdaıy syn kótermeıtin kólikter óte aýyr. Júk tasý múmkinshiligi 20 tonnadan 40 tonnaǵa deıin. Bul - qala joldarynyń buzylýynyń birden-bir sebebi. Ekinshiden, onsyz da ekologııalyq jaǵdaıy qıyn qalamyzdyń aýasyna qytaı kólikteriniń gazy qosylyp otyr.
Qalaı bolǵanda da metro salyp, jolaı ryqtar turǵyzyp, zııandy kásiporyndardyń jumysyn shekteýge tyrysqan qala ákimdiginiń eńbegin qytaı júk kólikteri esh etpese eken.
