Almatyǵa koronavırýsty anyqtaıtyn dıagnostıkalyq test júıe jetkizildi
ALMATY. QazAqparat – Almatyǵa koronavırýsty anyqtaıtyn dıagnostıkalyq test júıe jetkizildi. Bul týraly Almaty qalasy taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymova málimdedi, dep habarlaıdy QazAqparat tilshisi.
«Reseıden koronavırýsty anyqtaıtyn testiler jetkizildi. Endi elimiz, onyń ishinde Almaty qalasy da qaýipti vırýsqa qarsy test jumystaryn júrgizýge daıyn. Test tekserisi eki saǵat aralyǵynda jasalady. Keıin ol ortalyq referentti zerthanaǵa jiberiledi jáne sońǵy qorytyndy sol jerde jasalady», - dep túsindirdi Aızat Moldaǵasımova.
Onyń aıtýynsha, bul ýaqytqa deıin 17 adamnyń qanyn saraptamaǵa jiberilgen, olardyń bári taza bolyp shyqty. Kúdikke ilingenderdiń barlyǵyna JRVI men tumaý dıagnozy qoıyldy. Ortalyq referentti zerthanaǵa Qazaqstannyń túkpir-túkpirinen, sonyń ishinde Almaty qalasynan kelgenderden 111 úlgi alyndy. Onyń 100-i teris nátıjeli, al 11 synama áli tekserilip jatyr.
Almatydaǵy emhanalardyń barlyǵynda naýqastardy oqshaýlaý orny ashyldy. Buǵan deıin mundaı oryndar aýrýhanalarda jasaqtalǵan bolatyn.
«Eger koronavırýs tarap jatqan jerden kelgen bolsańyz polıklınıkaǵa nemese qan tapsyrý zerthanalaryna barýdyń qajeti joq. Birden 1406 Call-ortalyǵyna habarlasyńyzdar, sol jerde tıisti jaýap ala alasyzdar nemese jedel járdem shaqyryńyzdar», – dedi ol.
Eske salaıyq, Almatyda Almaty qalasy ákiminiń orynbasary Erjan Babaqumarovtyń tóraǵalyǵymen koronavırýstyq ınfektsııanyń taralýynyń aldyn alý jónindegi óńirlik shtab qurylǵan. Óńirlik shtab megapolıs áýejaıynda koronavırýsqa qarsy is-qımyl sharalardyń oryndalýyn tekserdi.
