Almatyǵa kirý úshin blok-beketti aınalyp ótpek bolǵan azamattar 5 táýlikke qamaldy
TALDYQORǴAN. QazAqparat - Almaty oblysyndaǵy tosqaýyl-beketti aınalyp ótýge tyrysqan azamattar 5 táýlikke qamaýǵa alyndy, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, jaqynda tórt azamat Almaty qalasymen shektes blok-beketti zańsyz aınalyp ótýge tyrysqan.
«Atap aıtqanda, 1986 jyly týǵan Túrkistan qalasynyń turǵyny elimizdegi tótenshe jaǵdaı tártibin buza otyryp, Almaty qalasynyń aýmaǵyna Aqsaı ózeni arqyly jasyryn ótýge tyrysqan. Ekinshi jaǵdaıda 1968 jyly týǵan Almaty oblysynyń turǵyny osy ádispen karantın jarııalanǵan aýmaqqa ótýge árekettengen. Taǵy bireýi - Almaty oblysynyń turǵyny. Ol Іle aýdany Pokrovka eldimekeniniń mańyndaǵy №22 blok-beket janynda ustaldy. Tórtinshi quqyq buzýshy 2000 jylǵy Qyrǵyzstan eliniń azamatshasy bolyp shyqty. Shetel azamatshasynyń eshqandaı qujaty joq bolyp shyqty. Qazirgi jaǵdaıda atalǵan azamattardyń áreketi qoldanystaǵy zańnamaǵa sáıkes qatań jazalanatyny belgili»,- dedi Qarasaı aýdany polıtsııa basqarmasynyń bastyǵy polıtsııa polkovnıgi Ashat Danııar.
Ustalǵan azamattarǵa QR Ákimshiliq quqyq buzý týraly kodeksiniń 476-babyna sáıkes hattama toltyryldy. Sondaı-aq, mamandandyrylǵan aýdanaralyq sot sheshimimen olar 5 táýlikke qamaldy.
Al, Qyrǵyz Respýblıkasynyń azamatshasy barlyq jaǵdaı anyqtalǵanǵa deıin qabyldaý-taratý mekemesine ornalastyryldy.
