Almatyǵa kire-beris joldarǵa qatysty máseleler keshendi sheshilýi tıis - A. Esimov
ALMATY. QazAqparat- Búgin Almaty qalasynyń ákimi Ahmetjan Esimov «Bishkek-Almaty» magıstralyn qaıta jańǵyrtý máseleleri boıynsha kóshpeli keńes ótkizdi, dep habarlady Almaty qalasy ákiminiń baspasóz qyzmetinen.
Bul keńeske QR Óńirlik damý mınıstrligi, QR Kólik jáne kommýnıkatsııa mınıstrliginiń Avtokólik joldary komıteti, «Qazavtojol» Ulttyq Kompanııasy» AQ, Almaty oblysy ákimdigi jáne qalalyq beıindik qurylymdar men vedomstvolardyń ókilderi qatysty.
Kóshpeli keńes barysynda Ahmetjan Esimov Almatynyń batys jaǵyndaǵy qalaǵa kire-beris torapta ornalasqan birqatar kólik ınfraqurylymdaryn aralady. Qalalyq jol polıtsııasynyń málimdeýinshe, búginde osy joldyń boıynda kólik keptelisi jıi oryn alady. Buǵan avtokólikterdiń kóbeıgendigimen qatar, beı-bereket salynyp jatqan qurylystar da sebep bolýda.
Málim bolǵanyndaı, respýblıkalyq mańyzǵa ıe Almaty-Bishkek tas jolynyń boıynda qalanyń eski shekarasynan Bishkek-Astana jol aıryǵyna deıin, jol boıynda janarmaı quıatyn stansalar, dámhana, bazarlar jáne t. b. 70 qyzmet kórsetý nysany jumys isteıdi eken. Al 29-y birqatar zańbuzýshylyqtarmen salynǵan jáne olar qyzyl syzyqtyń boıynda jáne joldardy burý jolaǵynda ornalasqan.
Qala ákiminiń aıtýynsha, Almatynyń batys jaǵyndaǵy kire-beris jolǵa qatysty túıtkildi máseleler keshendi túrde sheshilmegen. Mysaly, QR Kólik jáne kommýnıkatsııa mınıstrliginiń Avtokólik joldary komıteti 2012 jyly Almaty ákimdigi men Kólik jáne kommýnıkatsııa mınıstrligi arasynda qol qoıylǵan «Almatynyń kólik-kommýnıkatsııalyq keshenin damytý boıynsha josparyna» qatysty mindettemelerdiń kóp bóligin oryndamaǵan.
Al qala ákimdigi negizgi kólik magıstraldaryn batys baǵytta qalanyń syrtqy shekarasyna deıin jetkizip otyr. Bul jerde Aqyn Sara, Rysqulov jáne Momyshuly dańǵyldarynda jol aıryqtary jasaldy.
Sondaı-aq, bazarlardy jańǵyrtý baǵdarlamasynyń nátıjesinde Soltústik aınalma joly kólik keptelisinen bosatyldy. Jaqyn ýaqytta munda jańa kólik dálizi salynady. Onda tranzıttik kólikterge bólek jolaq belgilenedi jáne avatoturaqtar men júrginshilerge arnalǵan jolústi ótkelderi salynady. Bosatylǵan aýmaqtar abattandyrylady jáne saıabaqtyq aımaqtar jasalady.
«Minekı, endi batys baǵytta da Kólik jáne kommýnıkatsııa mınıstrligimen jáne Almaty oblysynyń ákimdigimen birlese otyryp, osyndaı keshendik tásildemelerdi júzege asyrý kerek», - dedi óz sózinde Almaty qalasynyń ákimi.
