Almatyǵa kelgen «Teńizshevroıl» qyzmetkerinen koronavırýs tabyldy
ALMATY. QazAqparat – Almatyǵa arnaıy bortpen keshe kelgen «Teńizshevroıl» JShS jumyskerinen koronavırýs tabyldy. Bul týraly qala ákiminiń birinshi orynbasary Erlan Qojaǵapanov onlaın brıfıng barysynda aıtty, dep habarlaıdy QazAqparat tilshisi.
«Qazirgi kezde shtab Atyraýdan kelgen qyzmetkerlerdi qabyldaý jumystarymen aınalysýda. Búgin Teńizden (Teńizshevroıl) 200 jumysker arnaıy bortpen keledi. Olardy karantınge jatqyzamyz. PTsR taldaýlaryn alamyz. Bul sońǵy 5 kúnde kelgen 3-bort bolyp otyr. Keshe Atyraýdan kelgen qyzmetkerlerdiń arasynan bir adamnan vırýs tabyldy. Qazir ony epıdemıolog dárigerler qarap jatyr», - dedi Erlan Qojaǵapanov.
Aıta ketý kerek, Atyraý oblysynda koronavırýs ınfektsııasy anyqtalǵan naýqastyń biri «Teńiz» kenishinde jumys istegenin habarlaǵan bolatynbyz.
Qazir Atyraý oblysyndaǵy Teńiz kenishinen «Teńizshevroıldyń» jáne ózge de merdiger kompanııalardyń jumysshylaryn ýaqytsha shyǵarý jalǵasyp jatyr.
22 sáýirdegi málimetke sáıkes, ken ornynan 17 myń adam shyǵarylady.
