Almatyǵa keletin týrısterdiń 40 paıyzy - sheteldikter
ALMATY. QazAqparat - Almaty ákimdigi týrızm salasyn damytýǵa byltyr 1 mlrd teńgege jýyq aqsha jumsaǵan, dep habarlaıdy QazAqparat tilshisi.
«2018 jyly Almaty qalalyq týrızm jáne syrtqy baılanystar basqarmasy týrıstik ınfraqurylymdy damytýǵa, týrıstik salanyń kadrlyq áleýetin arttyrýǵa 1 mlrd teńge jumsaǵan. Onyń ishinde áýejaı men taksı, vokzal qyzmetkerlerine arnaıy trenıng júrgizildi. Olar kelgen qonaqtardy kútip alyp, olarǵa qyzmet kórsetýge mashyqtandy», - dedi Týrızm basqarmasynyń bólim basshysy Aslan Qońyrhanov.
Onyń aıtýynsha, Qazaqstandaǵy týrızm aǵymynyń besten biri Almatynyń úlesinde.
Olardyń 40% - sheteldik týrıster. Kóbinese Reseı jáne Qytaı týrısteri Qazaqstanǵa jıi at izin salady.
«Almatynyń ımıdjin qalyptastyrý máselesine kelsek, 2017-2018 jyldary BBC, Euronews qyzmetterimen jáne eń iri TripAdvisor týrıstik saıtpen áriptestik jumystaryn júrgizdik. Qalada 8 aqparattyq dúńgirshek, Almaty Pass kartasy ashyldy. Kartany alǵan týrıst Almatydaǵy qoǵamdyq kólik marshrýttaryn paıdalanyp, kórnekti jerlerge bara alady», - dedi basqarma ókili.
Onyń aıtýynsha, qaladaǵy nysandarda QR-kod qoıylady. Osy kod arqyly nysannyń tarıhy týraly aqparat tyńdaýǵa múmkindik berilgen.
Sonymen qatar, bıyl Boraldaı saq qorǵandarynda mýzeı ashý, Voznesen soboryn qaıta qalpyna keltirý, «Etnolend» etnomádenı keshenin, Raıymbek memorıaldy keshenin salý kózdelgen.
Ákimdik ekotýrızm baǵytyn damytýdy da qolǵa alyp otyr. Onyń ústine, Almaty mańynda ornalasqan Han Táńiri shyńy, Sharyn shatqaly men Kólsaı kóliniń áleýetteri joǵary.
Qazaqstan týrıstik qaýymdastyǵynyń tóraıymy Rashıda Shaıkenova Eýropalyq týrızm odaǵy men qaýymdastyq arasynda eń tartymdy aımaq - Almaty men Almaty oblysynda ekotýrızmdi damytý boıynsha úlken joba jasalyp jatqanyn aıtty.
Onyń aıtýynsha, byltyr Almatyǵa 700 ekotýrıst kelgen.
