Almatyǵa qazaqstandyq vaktsınanyń 6 myń dozasy jetkiziledi
ALMATY. QazAqparat - Sáýir aıynda Almatyǵa qazaqstandyq QazCOVID-in vaktsınasynyń 6000 dozasyn, sondaı-aq «Spýtnık V» vaktsınasynyń 65 000 dozasyn jetkizý josparlanyp otyr. Múmkin qytaılyq vaktsına jetkiziletin shyǵar. Bul týraly onlaın brıfıng barysynda qalanyń bas memlekettik sanıtar dárigeri Jandarbek Bekshın men qalalyq qoǵamdyq densaýlyq saqtaý basqarmasynyń bastyǵy Narıman Tabynbaev málim etti, dep habarlaıdy QazAqparat tilshisi.
Almatynyń bas memlekettik sanıtar dárigeri men densaýlyq saqtaý basqarmasynyń basshysy sáýir aıynda qalada jappaı vaktsınatsııalaý bastalatynyn aıtty.
«Almatyda sáýirde jappaı vaktsınatsııa bastalady. Vaktsınatsııa pýnktterin 250 jerde ornalastyrý josparlanyp otyr. Negizinen memlekettik emhanalar, jeke qurylymdaǵy medıtsınalyq mekemeler qamtylǵan. Biraq saýda ortalyqtaryn da tartýǵa bolady. Kelissózder júrgizilip, jumys toby quryldy. Densaýlyq saqtaý mınıstri Alekseı Tsoıdyń málimdemesine súıensek, Almatyǵa 65 000-nan asa «Spýtnık V» vaktsınasyn ákelý josparlanǵan», - dedi Narıman Tabynbaev.
Jandarbek Bekshın qazaqstandyq KazCOVID-in vaktsınasynyń alty myń dozasyn jetkizý sáýir aıyna josparlanyp otyr dedi.
Óz kezeginde, qalalyq qoǵamdyq densaýlyq saqtaý basqarmasynyń basshysy Almatydaǵy jeke medıtsınalyq ortalyqta reseılik vaktsınany aqyly túrde egý usynylady degen aqparatty joqqa shyǵardy.
«Vaktsınatsııa máselesi densaýlyq saqtaý mınıstrliginiń baqylaýynda. Barlyq vaktsınalar arnaıy organmen «SK-Farmatsııa» JShS arqyly óńirlerge taratylady. Almatyda «SK-Farmatsııa» JShS qyzmetkerleri preparatty qalalyq vaktsınalar qoımasyna jeke aparyp tapsyrady. 17 750 doza arnaıy qurylǵan komıssııanyń sheshimimen bólindi. Almatyǵa basqa vaktsınalardyń jetkizilgeni týraly týraly málimet joq», - dedi ol.
Spıkerlerdiń aıtýynsha, jappaı vaktsınatsııa adamnyń qaı jerdegi aýrýhanaǵa tirkelgenine qaramastan tegin júrgiziletinin jetkizdi.
