Almatyǵa FIFA kýbogi ákelinedi
ASTANA. QazAqparat - Almatyda ótken halyqaralyq fýtbol kúnine arnalǵan baspasóz máslıhatynda Coca-Cola kompanııasynyń ókili Qazaqstanǵa Álem kýbogi keletindigin málimdedi, dep habarlaıdy sport.inform.kz saıty.
Teńbil dop dodasynyń eń basty trofeıin FIFA-nyń resmı ókilderi 2018 jyly aqpannyń 4-i kúni Pákistannan Almatyǵa alyp keledi. Bir kúnnen soń kýbok basqa elge óz týryn jalǵastyrady. Fýtbol dodasynyń bastalýyna deıin álem kýbogy dúnıejúziniń 52 memleketin aralaıdy. Qazaqstan osy trofeıdi ekinshi ret qabyldaıtyn alǵashqy memleket bolady. Birinshi ret Álem kýbogy Almatyǵa 2010-shy jyly kelgen bolatyn.
- Bul Kýbok arnaıy kúmbezdiń ishinde saqtalyp, bir kún boıy Almatynyń Rozybakıeva kóshesindegi ortalyq Megada turatyn bolady. Qala qonaqtary men turǵyndary kelip kórýge, sýretke túsýge múmkindik alady, - dedi Coca-Cola kompanııasynyń ókili Aleksandra Akkırman.
Álem chempıonattarynyń aldynda ótkiziletin dástúrli týr qyrkúıek aıynyń 9-y kúni Reseı astanasy Máskeý qalasyndaǵy «Lýjnıkı» stadıonynda bastaldy. Osy alańda ashylý saltanaty men fınaldyq oıyn ótedi. FIFA kýboginiń týry Reseıde mamyr aıynda aıaqtalady.
