Almatyǵa bıyl 500-den asa jańa avtobýs satyp alynady
ALMATY. QazAqparat - Almaty bıligi bıyl taǵy da 500-den asa jańa avtobýs satyp almaq. Bul týraly Almaty ákimi Baýyrjan Baıbek №19 baǵyty boıynsha jolǵa shyqqan jańa avtobýstardy aralap kórgennen keıin aıtty, dep habarlaıdy QazAqparat tilshisi.
Onyń aıtýynsha, bıyl «Almatyelektrotrans» JShS únemdelgen qarjy men taza tabys esebinen LıAZ jáne IVECO markaly 199 avtobýs alýdy josparlap otyr.
Sonymen qatar, «Green Bus company» JShS gazben júretin 200 avtobýs alatyn bolady. Jeke tasymaldaýshylar taǵy da 131 kólik quralyn satyp almaq. Osylaısha, Almatynyń avtobýs parki taǵy da 30%-ǵa jańartylmaq.
Bulardan ózge qalada metro jelisi men eki stansa salynyp jatyr. BRT jáne LRT jobalaryn júzege asyrý qolǵa alynýda. Jyl aıaǵyna deıin birikken qazaq-nemis kompanııasy elektroavtobýstar shyǵaratyn zaýyttyń qurylysyn bastaıdy.
Búginde qalada kólik reformasy aıasynda birqatar marshrýttar boıynsha avtobýstar jańardy.
Sońǵy ret №19 baǵytqa jańa avtobýstar shyqty.
Qala turǵyndarynyń ótinishi boıynsha ashylǵan jańa baǵyt Jarokov, Rozybakıev, Rysqulov sııaqty magıstraldi kóshelerdi jáne «Qazahfılm», «Alǵabas» eldi mekenderin qamtıdy. Endi bul baǵyttahlf syıymdylyǵy úlken 20 avtobýs qyzmet kórsetedi.
Jalpy, kólik reformasy aıasynda sońǵy eki jyl ishinde qalanyń baǵyt jelilerine 500 jańa avtobýstar shyqqan. Kólikti jańartýdyń arqasynda 18 baǵyt boıynsha avtobýstardyń qozǵalys ıntervaly 3 esege qysqaryp, jolaýshylardyń kúndelikti legi ortasha 46%-ǵa artqan. Bulardan ózge, 14 jańa baǵyt ashyldy. Qalalyq avtoparktegi qoldanylǵany 3 jylǵa deıingi avtobýstar úlesi qazirdiń ózinde 44 %-dy quraıdy.
Aıta keterligi, Almatyda №12, 22, 50, 56, 57, 65, 69, 70, 86, 95, 103, 112, 115, 124, 126, 127, 131, 137 baǵyttary boıynsha jańa avtobýstar jolǵa shyǵyp, №77 jáne № 98 baǵyttary qaıta jańaryp, №1 baǵyt pen №201 magıstraldy baǵyty ashylǵan edi. Kórshi oblystan qalaǵa qosylǵan eldi mekenderdi kólikpen tolyq qamtý úshin 10 baǵyt ashylǵan bolatyn.
