Almatyǵa bıyl 130 myńnan astam sheteldik týrıst kelgen
ALMATY.QazAqparat - Almatyǵa bıylǵy jyly 130 myńnan astam sheteldik týrıst kelgen. Bul týraly qala ákimi Baýyrjan Baıbektiń «Týrızmdi damytýdyń 100 qadamy» baǵdarlamasy boıynsha ótken otyrysynda aıtyldy, dep habarlaıdy QazAqparat tilshisi.
Jıynda sońǵy úsh jylda sheteldik týrıster sany 14%-ǵa óskendigi, onyń ishinde Ońtústik Koreıadan, Úndistan men Reseıden, Qytaıdan, Túrkııadan, AQSh pen Germanııadan 130 myńnan astam adam bolǵany aıtyldy.
Qala ákiminiń orynbasary Ásel Júnisova elimizde ótken halyqaralyq jobalar týrıster legine oń yqpal etkenin atap ótti.
«EKSPO-2017» kórmesiniń, Búkilálemdik Ýnıversıadanyń, OESR Eýrazııalyq aptalyǵynyń, sonymen qatar «Star of Asia», «Spirit of Tengri», «Uly dala oıyndary», «Almaty Marafon» jáne «Tour of Almaty» syndy mýzykalyq , sporttyq sharalardyń ótýi týrısterdiń kóptep kelýine sebep bolýda»,- dedi Ásel Júnisova.
Búginde kúni qala ekonomıkasynyń 87%-yn qyzmet kórsetý salasy quraıdy, alaıda Almatynyń jalpy óńirlik tabysynda týrızmniń úlesi nebári 1,5%. Megapolıstiń týrıstik áleýetin arttyrý maqsatynda Almaty aglomeratsııasynyń taý týrızmi boıynsha jospary jasalyp, onyń quramyna Medeý, Shymbulak, Almataý jáne Býtakovka endi.
«Bıylǵy jyly álemdik deńgeıdegi Kempinski jáne Novotel otelderiniń, hostelderdiń qurylystaryn aıaqtaý josparlanǵan. Jyl aıaǵyna deıin 14 halyqaralyq agenttik úshin BUU-nyń óńirlik HAB-y ashylady. Parıjdiń, Ystanbuldyń, Bangkoktyń tájirıbesi mundaı sharanyń sheteldik týrıster legin ulǵaıtatynyn, halyqaralyq deńgeıde qalanyń tanymdylyǵyn arttyratynyn kórsetti», - dedi Ásel Júnisova.
Ol sonymen qatar qazirgi kezde týrısterdiń kópshiligi óz betterinshe saparǵa shyǵatynyn, arnaıy veb- tuǵyrlar arqyly demalystaryn josparlaıtynyn aıtty.
«Jyl saıyn Almatyǵa degen qyzyǵýshylyq artýda, ony destınatsııa arqyly álemdik TripAdvisor tuǵyrnamasynan kórýge bolady, onda qalaǵa qatysty suranys 465-ten 66 824 ótinimge ósken. Bul tuǵyrnamany kóbinese AQSh-tyń, Reseıdiń, Ulybrıtanııa men Úndistannyń,Germanııanyń azamattary paıdalanady», - dedi Ásel Júnisova.
