Almatyǵa Azııanyń eń úzdik tóreshisi keledi
ASTANA. QazAqparat - 25-27 jeltoqsan kúnderi Almaty qalasynda halyqaralyq jeńil atletıka federatsııalary qaýymdastyǵynyń (IAAF) baǵdarlamasy boıynsha ótetin tóreshilerdiń biliktiligin arttyrýǵa arnalǵan oqý kýrsyna Azııanyń eń úzdik tóreshisi keledi, dep habarlaıdy QazAqparat.
«Negizgi lektor retinde Azııanyń eń úzdik tóreshileriniń biri - Vadım Nıgmatov kelmek. Tájikstandyq mamannyń jastyǵyna qaramastan iri halyqaralyq dodalardaǵy tájirıbesi mol. Ol Azııa oıyndary men Azııa chempıonatynda, búkilálemdik Ýnıversıada, Olımpıada oıyndary, «Gaýhar lıgada» tórelik etken. 33 jastaǵy Nıgmatov 2006 jyly halyqaralyq dárejedegi tóreshi atandy. Sóıtip, jeńil atletıkadaǵy álemniń eń jas tórashisi atandy», - dep jazady QR Jeńil atletıka federatsııasynyń resmı saıty.
Tájikstandyq tóreshi búgingi tańda Shveıtsarııanyń Lozanna qalasynda turady. Sońǵy jyldary Eýropa jeńil atletıka qaýymdastyǵynda eńbek etip júr. Onyń negizgi mindetine Eýropadaǵy jeńil atletıkadan iri dodalardyń daıyndyǵyn baqylaý kiredi.
Nıgmatov 22-23 qazan kúnderi Londonda emtıhan tapsyryp, International Technical Official (ITO) dárejesine ıe boldy. Endi aldaǵy 4 jylda IAAF saıystaryna qazylyq etýine tolyq múmkindigi bar. Emtıhannyń qorytyndysy boıynsha mundaı lıtsenzııany Azııadan 4 adam ǵana aldy. Sonyń biri - osy Vadım Nıgmatov.
Aıta keteıik, 25-27 jeltoqsan kúni Almatyda ótetin tóreshilerge arnalǵan kýrsqa IAAF talaby boıynsha tek 20 qazy qatysa alady. Kýrs aıaqtalǵan soń, qatysýshylar emtıhan tapsyryp, arnaıy sertıfıkatqa ıe bolady.
