Almatyǵa áýe reısimen kelgender qaıda aıaldaýy kerek
ALMATY. QazAqparat - Almaty qalasynyń bas memlekettik sanıtarlyq dárigeri Jandarbek Bekshın qalaǵa ushaqpen kelgenderdiń qaıda aıaldaıtyny jóninde aıtyp berdi, dep habarlaıdy QazAqparat tilshisi.
Onlaın otyrys barysynda, Qoǵamdyq keńestiń tóraǵasy Rahman Alshanov bas sanıtarlyq dárigerden Almatyǵa jumys saparymen kelgen adamdar qaıda toqtaıtynyn surady. Óıtkeni, megopolıstegi qonaq úıler men dámhanalar áli ashylǵan joq.
«Biz Almatyǵa kelýshilerdiń sanyn shekteımiz. Áýe reısteri kimderge ashyq? Qala turǵyndary men emdelýge muqtaj adamdar úshin. Baıqaǵanyńyzdaı, reıster sany shekteýli. Tek shuǵyl qajet bolǵan kezde ǵana ruqsat beriledi. Óńirler arasyndaǵy týrızm 1 maýsymǵa deıin ashylmaıdy», - dep túsindirdi ol.
Sonymen qatar, ol qyzmettik issaparlarǵa toqtalǵan.
«Іssaparmen kelgenderge de talap bir. Kim shaqyrady, sol qamtamasyz etýi kerek. Bizde karantın rejımi áli bar», - dep qosty ol.
Aıta ketý kerek, 1 mamyrdan bastap Qazaqstanda kóptegen baǵyttarǵa áýe reısteri ashyldy.
