Almatyǵa 26 mln teńgege sheteldik blogerler shaqyrylady

ALMATY. QazAqparat - Almatyǵa 26 mıllıon teńgege sheteldik blogerler shaqyrylady. Bul týraly qalalyq týrızm basqarmasy málim etti, dep habarlaıdy QazAqparat tilshisi.

Maqsat - qalanyń halyqaralyq jáne ishki naryqtardaǵy brendterin álemge tanytý.

Baspasóz-týry eki kezeńge bólingen. Bireýi bıyl 2/3 toqsanda, ekinshisi 3/4 toqsanda ótkiziledi. Ár kezeńde Grýzııa, Armenııa, Belarýs, Reseı, Ýkraına, Túrkııa, Koreıa, BAÁ jáne Gonkongten 20 bloger shaqyrylady. Bul elderdi tańdaý Almatyǵa tikeleı reısterdiń jáne jańa saıahat oryndaryn izdeıtin jáne tólem qabileti bar aýdıtorııaǵa baılanysty.

Baǵdarlama aıasynda sheteldik blogerler Qazaqstannyń tarıhy men mádenıetinen syr shertetin jerlerdi aralaıdy.

«Atalǵan soma týrıstik nysandardy aralaýǵa, vıza rásimdeýge, tamaqtaný, medıtsınalyq kómek, barý-qaıtý ekonom-klass áýe bıleti, orys jáne aǵylshyn tilderinde gıd-aýdarmashyǵa jumsalady. Sondaı-aq blogerler úshin qazaqtyń ulttyq taǵamdaryn ázirleý boıynsha sheberlik synyby jáne ulttyq kıimdegi fotosessııamen qolónershiler sheberhanasyna barý uıymdastyrylady. Qazaqstanǵa kelgen qonaqtarǵa ulttyq kádesyılar usynylady. Baspasóz -týry Almatydaǵy epıdemıologııalyq jaǵdaıdy eskere otyryp ótkiziledi», - dep atap ótti basqarmadaǵylar.