«AlmatyEnergoSbyt» JShS-nyń tutynýshylarǵa qyzmet kórsetý ortalyqtarynda ashyq esik kúnderi bastaldy
ALMATY. Jeltoqsannyń 21-i. QazAqparat /Ádilet Musahaev/ - Búgingi tańda árqaısymyz elektr qýatyn óz qajettigimizshe paıdalanyp qana qoımaı, únemdi, uqypty paıdalanýǵa kóshetin kez keldi.
Bul jaıynda «AlmatyEnergoSbyt» JShS-niń tutynýshylarmen jumys jóninen basqarýshy dırektory Larısa Býgaeva aıtty, dep habarlaıdy QazAqparat.
Jeltoqsan aıynyń 21-inen 25-ine deıin jalǵasatyn sharanyń maqsaty energııany únemdeýdi nasıhattaý men tutynýshylar arasynda keńinen túsindirý jumystaryn júrgizý bolyp tabylady. Shara aıasynda servıs sapasyn jaqsartý, trafıktik saıasat, esepteý júıeleri jáne tólemder tártibi týraly túsindirilip, elektr qýatyn únemdeý ádisteri habarlandy. Sonymen qatar sharaǵa qatysqan qala turǵyndaryna energııa únemdeý boıynsha tanymdyq aqparat usynyldy, jadnamalar taratylyp, energııa únemdeýshi Philips shamdary syılyq retinde úlestirildi.
«Qarapaıym erejelerdi bilý árbir tutynýshyǵa jalpy memlekettik mindetti oryndaýǵa óz úlesin tıgizip qana qoımaı, sonymen qatar ár otbasynda qarajatty únemdeýine múmkindik beredi. Tutynýshylarǵa buǵan qalaı qol jetkizýdi túsindirý, sondaı-aq kompanııanyń qyzmetine baılanysty barlyq suraqtarǵa jaýap berý biz úshin óte mańyzdy», deıdi L.Býgaeva.
Jergilikti atqarýshy bılik, tutynýshylardyń quqyqtaryn qorǵaıtyn qoǵam, «Nur Otan» partııasy, AREM departamenti ókilderi, elektr energetıka sarapshylary men energııa resýrstaryn únemdeýdiń mańyzdylyǵy týraly óz oılaryn ortaǵa saldy. «Almaty qalasynda turǵyndardyń elektr qýatyn tutyný mólsheri jalpy óndirý mólsheriniń 30 paıyzyn alady. Bul derbes úıler, haýyzdar, jylytylatyn edender, jańa kópqabatty úıler. Únemdeý jumystary tıimdi júrgizilmeıdi, ásirese aýqatty adamdar elektr qýatyn únemdeı bermeıdi», deıdi Almaty energetıka jáne baılanys ınstıtýtynyń ǵylymı jumystar jáne halyqaralyq baılanystar boıynsha prorektory Vıacheslav Stoıak.
