«Almatyenergosbyt» JShS elektr qýaty tólemderin jeńildetedi
ALMATY. Maýsymnyń 3-i. QazAqparat /Erbol Turymbetov/ - Almaty qalasy men oblysynyń turǵyndary úshin jaryq aqysynyń tólem túbirtegin toltyrýǵa ózgeris endi. Bul týraly búgin Almatyda ótken baspasóz máslıhatynda «Almatyenergosbyt» JShS-niń bas dırektory Mıhaıl Gambýrger aıtty,
dep habarlaıdy QazAqparat.
Ózgeriske sáıkes, 10 maýsymnan bastap tutynýshy óziniń esepke alý aspabynyń naqty kórsetkishterine sáıkes, jumsalǵan qýatty ózi eseptep jáne túbirtekke tólenetin somany ózi toltyra alady.
Esterińizge sala keteıik, 2009 jyldyń 11 qyrkúıeginen bastap Almaty qalasy boıynsha, al osy jyldyń 5 qańtarynan bastap Almaty oblysynda elektr energııasy boıynsha saralaǵan tarıfter engizilgen bolatyn. Osyǵan oraı tólem túbirtekteri turǵyndardyń úılerine jetkizilip beretin bolyp ózgertilgen edi. Túbirtek tek «Almatyenergosbyt» JShS tarapynan toltyrylatyn. Bul turǵyndar tarapynan narazylyq týdyryp kelgen edi.
«Tutynýshylar pikirlerin jáne sarapshylardyń usynystaryn eskere otyryp, «Almatyenergosbyt» JShS 2010 jylǵy maýsymnan bastap esepshot túbirtegine tutynýshy málimetterdi ózinshe toltyratyn joldy qosty. Bul turǵyndar men sarapshylardyń pikirinshe, eleýli jeńildik týdyrady», deıdi Mıhaıl Gambýrger.
Onyń aıtýynsha, aldaǵy ýaqytta kompanııa elektr qýaty úshin esep aıyrysýdy únemi jetildirýge, tutynýshylarǵa qolaıly tólem qyzmetin engizýge umtylady.
