«AlmatyEnergoSbyt» tutynýshylarǵa qyzmet kórsetetin taǵy bir bólimshe ashty
ALMATY. Naýryzdyń 12-i. QazAqparat /Ádilet Musahaev/ - Búgin Almaty qalasy Medeý aýdanynyń tutynýshylaryna qyzmet kórsetetin №6 aýdandyq energııamen jabdyqtaý bólimshesiniń tusaýkeser rásimi ótti,
dep habarlaıdy QazAqparat.
Jańa AEJB-6 Medeý aýdanynyń 41 myńnan astam tutynýshysyna qyzmet kórsetedi. Sonyń ishinde 2 myńdaıy - zańdy tulǵalar, 39 myńnan astamy - turmystyq abonentter.
«AlmatyEnergoSbyt» JShS-niń Bas dırektory Mıhaıl Gambýrgerdiń aıtýynsha, jańadan AEJB ashylýy atalmysh aýdannyń elektr qýatyn tutynýshylaryna qyzmet kórsetý mádenıetin arttyrýǵa jáne jumystyń sapasyn jetildirýge baǵyttalǵan. Munda kórsetiletin qyzmet túrleri boıynsha barlyq qajetti jaǵdaılar jasalǵan. «Sońǵy úlgidegi jabdyqtarmen qamtylǵan bul bólimshe mamandardyń joǵary dárejede qyzmet kórsetýine septigin tıgizedi. Bizdiń barlyq operatorlarymyz arnaıy daıyndyqtan ótken bilikti jandar», deıdi Bas dırektor.
