«AlmatyEnergoSbyt» tutynýshylarǵa alaıaqtardan saq bolýdy eskertedi
ALMATY. QazAqparat - «AlmatyEnergoSbyt» JShS tutynýshylardy alaıaqtardyń áreketinen saqtanýdy eskertedi. Baspasóz qyzmeti habarlaǵandaı, qylmyskerler ózderin kompanııanyń qyzmetkerlerimiz dep aldap eldiń aqshasyn ıemdenýmen aınalysyp kelgen.
«Sońǵy ýaqytta mundaı jaǵdaı jıilep ketti. Alaıaqtar «kompanııanyń qyzmetkerimiz» dep aldap, tólenbegen qaryz degen syltaýmen adamdardan aqsha bopsalaǵan. Olardyń keıbiri jalǵan aıyp qaǵazyn da kórsetip jaryqty qıyp ketemiz dep doq kórsetken», - delingen habarlamada.
Óz kezeginde «AlmatyEnergoSbyt» JShS tutynýshylardan aqsha bopsalamaıtyndyǵyn jetkizdi.
Osyndaı jaǵdaı oryn alsa, kompanııanyń call-ortalyǵyna, 356 99 99, 356 99 00 nemese quqyq qorǵaý organdaryna habarlasýyn suraıdy.
