«Almatyelektrotrans» qoǵamdyq kólikterge qatysty jıi qoıylatyn suraqtarǵa jaýap berdi
ALMATY. QazAqparat – Almatydaǵy iri tasymaldaýshy kompanııa «Almatyelektrotrans» JShS qoǵamdyq kólikterdiń jumysyna qatysty jıi qoıylatyn suraqtarǵa jaýap berdi, dep habarlaıdy QazAqparat tilshisi.
«Almatyelektrotrans» JShS bes negizgi suraqqa jaýap berdi. Sony nazarlaryńyzǵa usynamyz.
1. Nege keıbir avtobýstarda kondıtsıoner istemeıdi nemese qosylmaıdy?
Onyń bir sebebi retinde tehnıkanyń aqaýynan baılanysty bolýy múmkin. Sondaı-aq, kondıtsıoner jolaýshylardyń ótinishimen óshirilgen de bolýy múmkin, sebebi, kondıtsıoner jolaýshylarǵa kondıtsıonerden jel soǵyp, sýyq bolýy múmkin. Bul másele júrgizýshini eskerte otyryp, jolaýshylardyń ózara mámilesimen sheshiledi.
2. Nege avtobýsta aıaldamalardy habarlamaıdy?
Onyń birneshe sebebi bolýy múmkin. Mysaly, kóliktegi aqparattandyrý qurylǵysy istemeýi múmkin. Bul jaǵdaıda salonda kórsetilgen telefon nómirine habarlasý kerek. Keıin parktiń tehnıkalyq qyzmeti aqaýdy jóndeıdi.
3. Nege avtobýstar qajetti aıaldamadan toqtamaı ótip ketedi?
Avtobýs marshrýtynda ol aıaldamanyń bar-joǵyn anyqtap alý kerek. Eger ol aıaldama bar bolsa, onda tasymaldaýshyǵa tikeleı habarlasý kerek (eger telefon nómiri bolsa) nemese Kólik holdınginiń koll-ortalyǵy: +7 727 397 01 91 nómirine habarlasý qajet. Bul rette marshrýt nómiri men avtobýs nómirin, júrgen ýaqytyn mindetti túrde habarlaý kerek.
4. Avtobýs júrgizýshisi jolaýshylardy tasymaldaý erejesin buzsa qaıda habarlasý kerek?
Ár avtobýstyń salonynda tasymaldaýshy kompanııalardyń telefon nómirderi bolady nemese áleýmettik jelide Open Almaty paraqshasynda másele boıynsha jazba qaldyrýǵa bolady. Sondaı-aq Kólik holdınginiń koll-ortalyǵy: +7 727 397 01 91 nómirine habarlasý qajet. Bul rette marshrýt nómiri men avtobýs nómirin, júrgen ýaqytyn mindetti túrde habarlaý kerek. Júrgizýshiniń jolaýshylardy tasymaldaý erejesin buzǵan sáttegi foto, vıdeosy bolsa tipti jaqsy.
5. Jolaýshylardy tasymaldaý erejesin buzǵan júrgizýshiler jaýapqa tartyla ma?
Olardyń eńbekaqysynan syıaqy mólsherin ustap qalý túrindegi tártiptik jaza qoldanylady. Keıbir jaǵdaılarda jumystan shyǵarylady. «Suraqtarǵa bizdiń kompanııanyń qyzmet kórsetetin avtobýstaryna qatysty jaýaptar berildi», - delingen «Almatyelektrotrans» JShS habarlamasynda.
