«AlmatyElektroTrans» basshysy 150 myń dollar para alyp jatqanda ustaldy

ALMATY. QazAqparat – «AlmatyElektroTrans» JShS bas dırektory kásipkerlik sýbektisiniń ókilinen 150 myń dollar kóleminde para alǵan. Bul týraly sybaılas jemqorlyqqa qarsy qyzmettiń Almaty qalasy boıynsha departamenti málim etti, dep habarlaıdy QazAqparat tilshisi.

Vedomstvonyń aqparatyna sensek, «AlmatyElektroTrans» JShS bas dırektorynyń kásipkerlik sýbektisi ókilinen 150 myń dollar kóleminde para alǵany, atqarylǵan jumys aktisine qol qoıyp, buryn jasalǵan kelisim boıynsha aqsha aýdarǵany áshkerelengen.

«30 qyrkúıekte sot ony qamaýda ustaý sharasyn sanktsııalady. Ózge málimetter tergeý múddesine sáıkes jarııalanbaıdy»,- delingen habarlamada.

Almaty qalalyq sotynyń baspasóz qyzmeti 30 qyrkúıek kúni Almatynyń mamandandyrylǵan aýdanaralyq tergeý soty kúdikti I-ge eki aıǵa deıin qamaýda ustaý túrindegi bultarpaý sharasy taǵaıyndalǵanyn málim etti.