Almatydan Ystyqkólge deıin aspaly jol salý kerek - M.Eleýsizov
MATY. 6 qyrkúıek. QazAqparat /Ádilet Musahaev/ - Ústimizdegi jylǵy tamyzdyń 26-sy kúni Elbasy Nursultan Nazarbaevtyń qabyldaýynda bolyp, 55 mınýt kóleminde elimizdiń qazirgi ekologııalyq jaǵdaıy tóńireginde keńinen áńgime qozǵap, kókeıimde júrgen usynystarymdy bildirdim. Bul jaıynda «Tabıǵat» ekologııalyq odaǵynyń tóraǵasy Mels Eleýsizov Almatyda arnaıy ótken baspasóz máslıhaty kezinde aıtty.
M.Eleýsizov kezdesý barysynda 1988 jyldan beri sheshýin tappaı kele jatqan Sorbulaq kóli máselesin kótergendigin jáne ondaǵy jaǵdaıdyń qazir tym nasharlap ketkendigin jetkizdi. «Nursultan Ábishulymen kezdesken kezde qaladaǵy qoqys máselesin sheshý úshin Astanada eko-tehnoparkin qurýdy jáne Almatydan Ystyqkólge deıin aspaly jol salýdy usyndym», -deıdi ol.
Sonymen qatar ol Qazaqstandaǵy aýyz sý máselesi de nazardan tys qalmaǵandyǵyn jetkizdi. «Bizdiń elimiz geografııalyq jaǵynan 8 sýly basseıinnen turady. Olar Aral-Syrdarııa, Balhash-Alakól, Ertis, Oral-Kaspıı, Esil, Nura-Sarysý, Shý-Talas, Tobyl-Torǵaılyq sýsharýashylyq basseıinderi. Osy sýly aýmaqty saqtap qalý úshin elimizdegi 14 oblysty 8-ge qysqartýdy ótindim», -deıdi M.Eleýsizov.
Onyń aıtýynsha, bir ǵana Balhash kóli tórt oblysqa da qarasty eken, alaıda onyń esh qaısysy kóldiń tazalyǵyna jaýapkershilikti moınyna almaı otyr eken, sondyqtan ol tek bir oblystyń jaýapkershiligine ótýi kerek. «Qazaqstanda sý jetispeýshiligi jyl ótken saıyn arta túsedi, sondyqtan sý basseıinderin saqtap qalýǵa nazar aýdaryp, bir sheshimge kelýimiz kerek», -deıdi «Tabıǵat» ekologııalyq odaǵynyń tóraǵasy. Ekologtyń bul usynysyn Elbasy halyqpen aqyldasa otyryp qana sheshý kerek degen toqtamǵa kelipti.
M.Eleýsizov sondaı-aq Almatydan Ystyqkólge deıin aspaly jol tartý arqyly eldegi týrızmdi damytýǵa jol ashýǵa bolatynyn jetkizdi. «Ony salýǵa zeınetaqy qorlaryndaǵy aqshalardy tıimdi paıdalanýǵa bolady. Eger ony salsaq halyq Ystyqkólge deıingi aralyqty 5 saǵatta tabıǵatty tamashalaı otyryp bara alady», -deıdi ol.
