Almatydan «Uly dala eline saıahattaý» úshin altynshy ekspedıtsııa jolǵa shyqty
ALMATY. QazAqparat - «Jańa jibek joly» altynshy ekspedıtsııasy Uly dala eline saıahatqa Almatydan jolǵa shyqty, dep habarlaıdy QazAqparat tilshisi.
Ekspedıtsııa jetekshisi, Kazakh Geography jobasynyń menedjeri Nurjan Alǵashovtyń aıtýynsha, bul «Uly dala eline saıahat» jobasyndaǵy sońǵy qorytyndy ekspedıtsııa. Bul joly ekspedıtsııa músheleri eki apta boıy Almaty, Jambyl, Túrkistan oblysyndaǵy eń ataqty oryndarǵa sapar shegetin bolady.
«Almatydan Qorǵas jaqqa shyǵamyz. 13 kún ishinde Kólsaı-Qaıyńdy, Altyn emel ulttyq parkinde, Sharyn shatqalynda, odan ári Jambyl oblysynda Qurtas pen Aısha bıbi mavzoleıinde, Aqsý-Jabaǵyly qoryǵynda, Saıram ulttyq parkinde, Saýran, Otyrar qalalarynda, Arystanbab mazarynda bolamyz. Ekspedıtsııa Túrkistan qalasynda aıaqtalady»,- dedi Nurjan Alǵashov.
Reseılik National Geographic bóliminiń qyzmetkerleri, kásibı fotorgraftar, Qazaqstan men Reseılik blogerler, barlyǵy 28 adam qonaq úılerde, kıiz úılerde, lagerlerde túneıtin bolady.
«Ár ekspedıtsııaǵa ártúrli adamdar irikteldi. Olardyń kópshiligi buryn saıahattap júrgen adamdar. Alys jolǵa shyǵýda tájirıbesi bar adamdar», -dedi N.Alǵashov.
