Almatydan Tashkentke jolǵa shyqqan ushaq áýejaıǵa qaıta oraldy

ALMATY. QazAqparat- Tashkentke ushyp shyqqan ushaq Almaty áýejaıyna qaıta oraldy, dep habarlaıdy QazAqparat tilshisi.

«Air Astana» áýe kompanııasynyń málimetinshe, Tashkentke ushqan ushaq dabyl qaqqysh júıesiniń iske qosylýyna baılanysty Almaty áýejaıyna qaıtyp kelgen.

«Almaty-Tashkent baǵytynda qatynaıtyn KS 129 ushaǵy 8 naýryzda túngi saǵat 23:05-te jarty saǵat keshigýmen ushyp, 00:46-da áýejaıǵa qaıta oraldy. Qaıta oralýǵa batareıa qýattaǵyshynyń durys jumys istemeýi týraly dabyldyń iske qosylýy sebep bolǵan. Reıs basqa áýe kemesimen oryndaldy, ol 03:05-te ushyp shyǵyp, dittegen jerge 03:45-te qondy. Barlyq jerde jergilikti ýaqyt kórsetilgen», - dep habarlady áýe kompanııasynyń baspasóz qyzmeti.

Dál osyndaı jaǵdaı byltyr jeltoqsan aıynda da bolǵan.

Almatydan Qostanaıǵa baǵyt alǵan FlyArystan ushaǵynyń tehnıkalyq aqaýǵa baılanysty áýejaıǵa qaıta oralýyna týra kelgen edi.