Almatydan tabylǵan máıit Nazerke Áriptiki bolýy múmkin
ALMATY. QazAqparat - Almatyda jas qyzdyń máıiti tabyldy, dep habarlaıdy QazAqparat tilshisi qalalyq ІІD baspasóz qyzmetine silteme jasap.
Múrde 1,5 aı buryn joǵalyp ketken 18 jastaǵy boıjetken Nazerke Áriptiki bolýy múmkin, dedi polıtsııa ókilderi.
«Qazir saraptama taǵaıyndaldy. Qosymsha aqparat saraptama qorytyndysynan soń belgili bolady. Sondyqtan biz izdeý jumystaryn toqtata almaımyz», - dedi ІІD resmı ókili Saltanat Ázirbek.
Nazerkeniń jaqyndarymen tildesý múmkin bolmaı jatyr.
Aıta ketý kerek, 18 jastaǵy boıjetken 1,5 aıdan beri úıine oralǵan joq. Árip Nazerke sońǵy ret Tuzdybastaý aýylyndaǵy úıinen 10 shilde kúni túski 14:00-15:00 shamasynda shyǵyp ketken. Qazirgi tańda Medeý aýdandyq ІІB izdestirý jumystarymen aınalysyp jatyr. Telefon qońyraýlary detalızatsııasynyń málimetteri boıynsha, Nazerke sońǵy ret Gýrılev 27 mekenjaıynda 40 mınýttaı otyrǵan. Keıin túngi 23:00 shamasynda Aısha bıbi 356 mekenjaıynda bolǵan. Atalǵan mekenjaıda shaǵyn dámhana men avtojýý orny bary anyqtaldy. Sońǵy ret Nazerkeni túngi saǵat 12 men 1:00 shamasynda dámhana qyzmetkerleri kórgen. Olardyń aıtýynsha, qyz jylaǵan kúıi jol boıyna júgirip shyqqan. Sodan beri eshkimniń kózine túspedi.
Jaqynda anasy Sáýle Sarbasova qyzyn urlaǵan adamdar bolsa qaıtarýdy ótinip, vıdeohabarlama jarııalaǵan bolatyn.
