Almatydan Shymkentke jolǵa shyqqan FlyArystan ushaǵynan aqaý shyqty

ALMATY. QazAqparat – Shymkentke bet alǵan FlyArystan ushaǵy Almaty áýejaıyna qaıtyp qondy, dep habarlaıdy QazAqparat tilshisi.

Bul týraly Ǵalııa Jaqypova esimdi jolaýshy Facebook-te jazdy.

«Aman-esenbiz. FlyArystan áýe kompanııasynyń Almaty-Shymkent reısi keste boıynsha ushyp shyqqan. Qajetti bıiktikke kóterilip qalǵanbyz. Otyzynshy mınýtta jolaýshylarǵa (tolyq reıstiń bortynda 150-den astam adam boldy) tehnıkalyq sebepterge baılanysty ushaq Almaty áýejaıyna oralýǵa májbúr ekeni habarlandy. Shynymdy aıtsam, óte qorqynyshty boldy. Bortta otyryp áli kóp sharýa tyndyryp úlgermegenimdi uqtym», - dep jazdy ol.
Óz kezeginde, FlyArystan kompanııasyndaǵylar májbúrli qoný sebebin baıandap, túsinikteme taratty.
«14 qyrkúıekte Almaty-Shymkent baǵyty boıynsha ushqan FlyArystan áýe kompanııasynyń KS-7105 reısi kezinde kompıýterlik júıe janarmaı júıesinde qatelik anyqtap, ekıpaj aqaýdy joıý úshin Almaty áýejaıyna qaıta oralý týraly sheshim qabyldady», - delingen aqparatta.
Kompanııanyń aqparatyna sensek, reıstiń keshigetini týraly aqparat berilgennen keıin, tasymaldaý erejelerine sáıkes, jolaýshylarǵa sý men tamaq berilgen.
«Qaýipsizdik – biz úshin negizgi basymdyq. Sondyqtan, ınjenerler ushaqtaǵy júıelerdiń jaramdylyǵyna kóz jetkizý úshin tekserý júrgizedi. Oǵan biraz ýaqyt qajet», - delingen kompaııanyń málimetinde.