Almatydan sanavıatsııa shaqyrtýǵa sebepker bolǵan naýqas áıel aqyry qaıtys boldy
ShYMKENT. QazAqparat - Almatydan sanavıatsııa shaqyrtýǵa sebepker bolǵan naýqas áıel aqyry qaıtys boldy. Bul týraly búgin Ońtústik Qazaqstan oblysynyń klınıkalyq aýrýhanasynyń jansaqtaý bóliminiń meńgerýshisi Vıacheslav Tsaı málimdedi, dep habarlaıdy QazAqparat tilshisi.
Bólim meńgerýshisiniń sózinshe, 30 jastaǵy Túrkistandyq Mereke Qozykenova keshe 22.10-dar shamasynda aýrýhana tóseginde kóz jumǵan. Dárigerler baýyr tserrozy, sepsıs, mıdyń isinýi sııaqty aýyr naýqasqa shaldyqqan kelinshektiń jaǵdaıy boıynsha birneshe ret respýblıkalyq ortalyqtardyń dárigerlerinen keńes alyp, emdik sharalar jasaǵanymen, beti beri qaramapty.
«Naýqas áıeldiń aýyr jaǵdaıy boıynsha úsh ret Respýblıkalyq akýsherlik jáne gınekologııa ortalyǵynyń mamandarymen jáne Syzǵanov atyndaǵy Ulttyq ǵylymı hırýrgııa ortalyǵynyń, Kardıologııa jáne ishki aýrýlar ǵylymı-zertteý ınstıtýtynyń bilikti mamandarynan keńes alyndy. Bir ret lakoroskopııalyq jolmen ota jasaldy. Degenmen onyń jaǵdaıy bastapqy kezde-aq aýyr bolatyn. Qansha emdik sharalar kórsetilgenimen, naýqas qaıtys boldy», - deıdi Vıacheslav Tsaı.
Aýrýhana tóseginde qaıtys bolǵan kelinshektiń artynda alty balasy qaldy. Eń kenje qyzyn ol úsh apta buryn bosanǵan bolatyn. 4,9 keli náresteni dúnıege ákelgen áıeldiń úıine shyǵarylǵan soń jaǵdaıy kúrt nasharlaǵan. Osydan keıin Túrkistandyq dárigerler ony oblystyq klınıkalyq aýrýhanaǵa joldaǵan.
Eske salaıyq, 3 qazan kúni Almaty-Shymkent baǵytynda sanıtarlyq avıareısin oryndaǵan «AN-28» ushaǵy saǵat 18:47-de Almatydan 28 shaqyrym qashyqtyqta radardan joǵalyp ketti. Sosyn saǵat 19.15-te ushaq Almaty oblysy Іle aýdanynyń Mejdýrechınsk aýyly mańynda apatqa ushyrap, órtengeni habarlandy. Bortta bolǵan 5 adam qaza boldy.
