Almatydan Máskeý oblysyna tikeleı ushaq qatynaıdy
ASTANA. QazAqparat - Almatydan Máskeý oblysyna tikeleı áýe reısi ashyldy, dep habarlaıdy QazAqparat QR IDM Azamattyq avıatsııa komıtetine silteme jasap.
«QR IDM Azamattyq avıatsııa komıteti reseılik «Ýralskıe avıalınıı» áýe kompanııasyna Almaty - Jýkovskıı (Máskeý oblysy) baǵytynda ushýǵa ruqsat berdi.
Bekitilgen kestege sáıkes, kúzgi-qysqy navıgatsııa kezinde 2018-2019 jyldardaǵy jeltoqsannyń 24-nen naýryzdyń 29-na deıin reıster A319/320/321 tıptegi ushaqta aptasyna 5 ret (dúısenbiden jumaǵa deıin) oryndalatyn bolady», - delingen komıtettiń Feısbýktegi paraqshasynda.
Komıtettiń málimetinshe, áýe tasymaly salasynda Qazaqstannan ushatyn áýe baǵyttary men reıster sany boıynsha Reseı jetekshi orynǵa ıe. Taraptar áýe tasymaly salasynda ózara tıimdi eki jaqty yntymaqtastyqty odan ári damytýdy kózdep otyr.
Aıta ketý kerek, qazaqstandyq áýe tasymaldaýshylar Astana-Frankfýrt, Astana-Túmen (Eır Astana), Astana-Qazan, Astana-Vılnıýs, Astana-Chelıabınsk, Astana-Krasnodar, Astana-Tomsk, Astana-Sochı (SKAT) jańa 8 baǵyt boıynsha ushyp júr.
Sheteldik áýe tasymaldaýshylar Rıga-Almaty («Air Baltic»), Novosibir-Pavlodar («Sıbır»), Krasnoıarsk-Almaty («Angara»), Máskeý-Qyzylorda (Aeroflot) jáne Helsınkı-Astana (Finnair) jańa áýe baǵyttaryn ashqan bolatyn.
