Almatydan Qostanaıǵa gýmanıtarlyq kómek jiberildi

ALMATY. QazAqparat- Almatyda Tobyl óńirine gýmanıtarlyq kómektiń kezekti legi jóneltildi. Qala turǵyndary bir kúnniń ishinde turmysqa qajetti zattar men azyq-túliktiń 120 tonnasyn jınady, dep habarlaıdy QazAqparat tilshisi.

«AMANAT» partııasy Almaty qalalyq fılıalynyń jaýapty hatshysy Meıirjan Otynshıev 4 qyrkúıekte qalada birneshe gýmanıtarlyq kómek qabyldaý pýnktteri ashylǵanyn atap ótti. «Keshe ǵana 50 tonna kómek jınap, onyń 40 tonnasyn birden Qostanaı oblysyna jónelttik. Qazir júk kólikteri jolda. Búgin taǵy 80 tonna qosymsha jiberdik. Qalada barlyǵy 120 tonna gýmanıtarlyq kómek jınaldy», - deıdi spıker. Aıtýynsha, gýmanıtarlyq kómek tizimine tez buzylmaıtyn ónimder: un, qant, kúrish, qaraqumyq, makaron ónimderi, ósimdik maıy, aýyz sý, konserviler (et/balyq), tósek-oryn jabdyqtary, turmystyq tehnıka jáne qurylys materıaldary kirdi. «Bul jumys azamattarymyzdyń, qala ákimshiliginiń, sondaı-aq kásipkerlerdiń qoldaýynyń arqasynda júzege asyrylyp jatqanyn atap ótkim keledi», - dedi Meıirjan Otynshıev. Sonymen qatar, ol Qostanaı oblysyna júk kólikterimen birge 10-ǵa jýyq volonter jiberilgenin, olar júkterdi jóneltý men taratýdyń barlyq protsesin úılestiretinin atap ótti.

Buǵan deıin megapolısten 2 júk kóliginiń jolǵa shyqqany týraly jazǵan bolatynbyz.