Almatydan eldiń ózge aımaqtaryna jolaýshy tasymaldaǵan júrgizýshiler ustaldy
ALMATY. QazAqparat– Almatyda jolaýshylardy basqa aımaqtarǵa zańsyz tasymaldaýdyń taǵy bir joly kesildi, habarlaıdy QazAqparat tilshisi.
Almaty qalalyq PD baspasóz qyzmetiniń málimetinshe, jolaýshylardy qaladan Qazaqstannyń ońtústik oblystaryna jetkizbek bolǵan jeke júrgizýshiler ustaldy.
«Engizilgen tótenshe jaǵdaı rejımine qaramastan, jolaýshylardy qaladan Almaty jáne Jambyl oblystaryna zańsyz tasymaldaý faktileri áli de jalǵasýda. Jaqynda polıtsııanyń jedel-izdestirý sharalary kezinde 10-nan astam taksı júrgizýshisi ustaldy. Olar qyzmetteri úshin bir adamnan 10-nan 20 myńǵa deıin aqsha alǵan»,- dep habarlaıdy qalalyq PD baspasóz qyzmeti.
Bul adamdardyń barlyǵy tótenshe jaǵdaı rejımin buzǵany úshin jaýapqa tartyldy. Olardy sot kináli dep tapty. Belgilengen shekteýlerge qaramastan, karantın aımaǵynan shyqqysy kelgen jolaýshylarǵa qatysty da tap osyndaı jaýapkershilik qarastyrylǵan. Olardyń is-áreketteri QR ÁQbK-niń 476-babyna sáıkes qarastyrylady.
