Almatydan el bıýdjetine 929 mlrd teńge salyq tústi

ALMATY. QazAqparat- Bıylǵy birinshi toqsannyń qorytyndysy boıynsha memlekettik bıýdjetke 929 mlrd teńge salyq tústi. Bul týraly Almaty qalasy boıynsha memlekettik kirister departamentiniń basshysy Qanat Baedilov málim etti, dep habarlaıdy QazAqparat tilshisi.

Spıkerdiń brıfıngte keltirgen kórsetkishin ótken jyldyń osy kezeńimen salystyrǵanda, 53 %-ǵa nemese 322 mlrd teńgege artyq ekeni baıqalady. Munyń ishinde, respýblıkalyq bıýdjetke 675 mlrd teńge túsken. Bul 2021 jylǵa qaraǵanda 237 mlrd teńgege kóp, ıaǵnı ósý qarqyny - 54 paıyz. Jergilikti bıýdjetke 254 mlrd teńge tústi.

«Búgingi kúnge qol jetken qarqyndy biz saqtaýǵa mindettimiz. Bul jaǵdaıda jyl sońynda Almaty qalasynyń memlekettik bıýdjetine túsimi alǵash ret 3 trıllıon teńgeden asatyn bolady, bul - biz úshin mańyzdy oqıǵa», - dedi Qanat Baedilov.

Aıta keteıik, respýblıkanyń memlekettik bıýdjetindegi Almatynyń úlesi zor.

«Bizdiń qalamyzdyń respýblıkalyq bıýdjetke túsim boıynsha «donor» ekeni barshaǵa aıan. Mysaly, byltyr Almaty qalasynyń bıýdjetinen respýblıkalyq bıýdjetke shamamen 190 mlrd teńge alyndy»,- deıdi spıker.