Almatydan Astanaǵa qatynaıtyn qosymsha baǵyttar ashyldy
Buǵan eki qala arasyndaǵy jolýshy leginiń 30% -ke artýy sebep bolyp otyr. Osyǵan deıin Almatydan Astanaǵa kúnine shamamen 4 832 adam qatynasa, mańyzdy shara qarsańynda bul kórsetkish 6 000 adamǵa deıin artady.
Atap aıtqanda, kún saıyn qos qala arasynda 13 ushý baǵytynda 1100 adam tasymaldansa, endi 300 jolaýshy orny bar taǵy da 4 reıs qosyldy. Kún saıyn Astanaǵa baratyn poıyzǵa 408 oryndyq taǵy bir vagon jalǵandy. Bulardan ózge, kúnara qatynaıtyn baǵytqa qosymsha quram bólindi, sonyń arqasynda jolaýshylar sany 512 adamǵa artty.
Kún saıyn júretin avtobýs reısteri 2- den 6-ǵa kóbeıdi, 110 orynǵa taǵy da 300 oryn qosyldy. Sondaı-aq, «EKSPO-2017» kórmesiniń Almatydaǵy jedel shtab basshysy Samǵat Ermekbaev megapolıste aqparattyq- túsindirý jumystarynyń qarqyndy júrip jatqandyǵyn aıtty.
«Ásirese, saýda oryndary ujymdarynda 187 myń adamǵa, óndiris oryndarynda 45 myń adamǵa, ekinshi deńgeıli bankterde 40 myń adamǵa, JOO-nyń 13 myń oqytýshysy men 130 myń stýdentke, bıýdjettik uıymdardaǵy 56 myń qyzmetkerge aqparattyq túsindirý jumystary júrgizildi. Atalǵan halyqaralyq kórmeniń mańyzdylyǵy jóninde qaladaǵy 201 mektep pen 80 orta oqý ornynda da synyp saǵattary ótip jatyr», - dedi Ermekbaev.
Jedel shtab basshysy qalada «EKSPO- 2017» týraly aqparattyń 130-y bılbord pen LED-dıspleıde, halyq kóp jınalatyn jerlerde keńinen kórinis tapqanyn aıtty.
Qalalyq kásipkerlik jáne ındýstrııaldy-ınnovatsııalyq damý basqarmasynyń málimetinshe, buǵan deıin Almatydan Astanaǵa azyq- túlik taýarlaryn tikeleı jetkizý týraly eki qala ákimdikteri arasynda memorandýmǵa qol qoıylǵan bolatyn.
Memorandým aıasynda 3 aı ishinde bas qalaǵa 20 000 tonna et, kókónis, jemis, sút ónimderin jetkizý josparlanǵan
