Almatydan Alakólge ushaq qatynaı bastaıdy
TALDYQORǴAN. QazAqparat - Endi almatylyqtar da elimizdegi eń tanymal týrıstik oryndardyń biri Alakólge ushaqpen jete alady. Erteń Almaty áýejaıynan Úsharalǵa alǵashqy reıs kókke kóteriledi. Ushaqtar aptasyna bes ret qatynaıtyn bolady, dep habarlaıdy QazAqparat tilshisi.
«Almaty-Úsharal-Almaty baǵytynda ushaqtar dúısenbi men senbi kúnderi ǵana qatynamaıdy. Bılettiń bir baǵytqa quny 10 myń teńge. Sonymen qatar, «Jetisý» áýekompanııasy Taldyqorǵan-Úsharal baǵytyndaǵy ushaqtardy iske qosady. Onyń ýaqytyn qosymsha habarlaıtyn bolamyz. Jalpy kóldegi týrıstik maýsym jaz aıynyń alǵashqy kúninen bastalady. Qazir demalys oryndary týrısterdi qabyldaýǵa tolyqtaı daıyn», - dedi Almaty oblysy ákiminiń baspasóz hatshysy Ǵalymurat Júkel.
Aıta ketý kerek, byltyr 21 shilde kúni Úsharaldaǵy áýejaı iske qosylǵan bolatyn. Buǵan deıin áýe reısi Astana-Úsharal, Taldyqorǵan-Úsharal baǵyttary boıynsha qatynady. Jalpy áýejaı Alakól jaǵalaýynan 86 shaqyrym jerde ornalasqan.
Bıyl Almaty oblysyndaǵy aıdyndy Alakólge 1 mıllıonnan asa týrıst keletini kútilýde. Týrızmdi damytý jaǵdaıymen tanysý úshin Alakólde jumys saparymen Elbasy Nursultan Nazarbaev bolǵan edi.
