Almatydan 2 táýlikte 23 555 kólik shyqty
ALMATY. QazAqparat – Almatyda 2 táýlikte 23 555 kólik oblysqa shyǵyp ketken. Bul týraly búgin onlaın brıfıng barysynda qalalyq PD Ákimshilik polıtsııa basqarmasynyń basshysy Jandos Muratalıev aıtty, dep habarlaıdy QazAqparat tilshisi.
«Qala aýmaǵy boıynsha engizilgen karantınge baılanysty qalanyń barlyq kirý jáne shyǵý joldarynda 27 blok-beketter ornalastryldy. Patrýldik polıtsııa polki, Jedel áreket etý jasaǵy, Qorǵanys mınıstriliginiń Ulttyq ulan sarbazdary jumyldyrylǵan atalǵan beketterde Almaty qalasyna kiretin barlyq avtokólikterge shekteý qoıyldy. Kólikterdiń qala aýmaǵyna, tek qana Almaty qalasynda tirkeýde bolýy tıis jaǵdaıda ǵana jiti tekserilip, ótkizilip jatyr. Blok-beketterdiń jumysy iske qosylǵan kúnnen bastap 28 960 avtokólik, onyń ishinde 23 744 jeńil kólik, 907 shaǵyn avtobýs, 4309 júk kóligi, barlyǵy 59 975 jolaýshy qala aýmaǵyna kirdi. Túrli jaǵdaılarǵa baılanysty jáne qala turǵynadary emes bolǵandyqtan 2765 kólik júrgizýshilerine qalaǵa kirýge ruqsat berilgen joq. Almaty oblysy aýmaǵyna kólikter eshqandaı kedergisiz ótkizilip jatyr. Jalpy Almaty qalasy aýmaǵynan 23 555 kólik, onyń ishinde 19392 jeńil, 746 shaǵyn avtobýs, 3417 júk kóligi, 50209 jolaýshy shyqty», - dedi Jandos Muratalıev.
Munyń aldynda blok beketteri arqyly 2000 teńgege Almaty terrıtorııasyna jolaýshy ótkizem dep ýáde bergen taksıst ustalǵanyn habarlaǵan bolatynbyz.
Karantın jarııalanǵaly beri 2 táýlik ishinde Almatyda qylmys kórsetkishi 25 paıyzǵa, jol apaty kórsetkishi 70 paıyzǵa azaıǵan.
