Almatydaǵy jyljymaly fotokórmede COVID-19-ben kúres kórinis tapqan
ALMATY. QazAqparat – Almatyda koronavırýspen kúreske arnalǵan fotokórme ashyldy, dep habarlaıdy QazAqparat tilshisi.
Bul bastamany Óńirlik kommýnıkatsııalar qyzmeti kóterdi. Munyń aldynda qala turǵyndary men qonaqtary COVID-19-ben kúresti nasıhattaý jónindegi áleýmettik jobaǵa qatysýǵa shaqyrylǵan edi.
Fotokórmede turǵyndar jibergen sýretterden arnaıy komıssııa tańdap alǵan 10 fotojumys pen grafıkalyq sýret qoıylǵan. Arnaıy komıssııa quramyna Almaty qalasynyń Mádenıet basqarmasynyń kontserttik bóliminiń basshysy Aınur Bajenova, Eýrazııa Mádenı Alıansy dırektorynyń orynbasary Olga Veselova, jeke, aýdıovızýaldy jáne foto qujattardy jınaqtaý bóliminiń muraǵatshysy Álim Haıdarov kirdi.
Ár jumysta COVID-19-ben kúres kórinis tapqan. Medıtsına qyzmetkerleriniń, epıdemıologtardyń, polıtsııanyń, eriktilerdiń jumys kadrlary men almatylyqtardyń pandemııamen kúrestegi kózqarastary beıneleý túrinde berilgen.
Jobanyń basty maqsaty – yqtımal jańa tolqyn qarsańynda sanıtarlyq normalardy, ásirese maska taǵý rejımin ustanýdyń mańyzdylyǵyn, pandemııamen kúreste aldyńǵy shepte tabylatyn jandardyń (medıtsına qyzmetkerleri, epıdemıologtar, polıtsııa, eriktiler t.b.) jumysynyń qundylyǵyn turǵyndardyń esine salý.
«Osy fotokórmeni uıymdastyra otyryp, biz qala turǵyndaryn aldyn alý sharalaryn kúsheıtýge shaqyrǵymyz keldi. Betperde taǵyp, áleýmettik qashyqtyqty saqtaý arqyly árbir adam qalanyń COVID-19-ben jalpy kúresine úlken úles qosady. Jalpyǵa ortaq sharalardyń arqasynda dárigerler men medıtsına qyzmetkerlerine júktelgen kúsh azaıyp, juqtyrý sany kemýi múmkin», - dedi óńirlik kommýnıkatsııalar qyzmetiniń ókilderi.
Bul jobaǵa yqylas bildirgen kez kelgen adam qatysa aldy. Ol úshin 5 fotosýret nemese basqa da grafıkalyq sýretti (karıkatýra, ıllıýstratsııa) jiberýi, eń basty shart erekshe kontent qoldaný bolatyn.
«Fototilshi retinde men koronavırýspen baılanysty jaǵdaıdy alǵashqy kúnderden bastap túsire bastadym. Qyzyq, keıde tipti qorqynyshty boldy. Bos qala, blok beketter, asyǵyp bara jatqan jedel járdem kólikteriniń sırenasy jáne taǵy basqa oqıǵalar erekshe este qaldy. Alaıda jumys oqıǵa ornynda bolýymdy qajet etti, onsyz halyqqa qalada ne bolyp jatqanyn kórsetý múmkin bolmas edi», - deıdi fotokórmege qatysýshy Oleg Spıvak.
Al Talǵat Galımov óziniń jumystary arqyly qala turǵyndaryna qaýipsizdik sharalaryn saqtaýǵa shaqyrǵysy kelgenin aıtty.
«Men adamdarǵa pandemııa men karantın kezinde ózimizdi qalaı ustaýymyz kerektigin kórsetkim keldi. Eń bastysy - osyndaı qıyn kezde adamdar bir-birine qurmet kórsetýdi umytpaı, birine-biri qamqor bolýlary kerek. Adamdardyń osy dertke qatysty dúnıetanymdary keńeıip, kóbirek jaýapkershilik tanytyp, qaýipsizdik sharalaryn ustansa, qashyqtyqty saqtap, betperde kıip júrse degim keledi. Sebebi bizden basqa muny eshkim jasamaıdy. Eger osyny ustanbasaq, bárimiz aýyryp qalamyz», - dedi Talǵat Galımov.
Almaty ákimdigi álemdegi epıdemııalyq jaǵdaıdyń ýshyǵa túskenin eskere otyryp, qala turǵyndaryn aldyn alý sharalaryn qatań saqtaýǵa jáne sanıtarlyq-epıdemııalyq sharalardy ustanýǵa shaqyrady.
Jyljymaly fotokórme qalanyń ár aýdanynda 12 qarashadan 19-qarashaǵa deıin saǵat 10:00-20:00 aralyǵynda ótetin bolady:
13 qarasha - Alataý aýdany, «ALATAÝ» saýda ortalyǵy, Rysqulov dańǵyly, 103/3;
14 qarasha - Áýezov aýdany, «GRAND PARK» saýda ortalyǵy, Qabdolov kóshesi, 1;
15 qarasha - Túrksib aýdany, «MART» SOO, Rıhard Zorge kóshesi, 18/4;
16 qarasha - Jetisý aýdany, «MAXIMA» SOO, Raıymbek dańǵyly, 239g;
17 qarasha - Bostandyq aýdany, «ATAKENT MALL» SOO, Tımırıazev kóshesi, 42 k3;
18 qarasha -Almaly aýdany, «TsÝM» saýda úıi, Abylaı han dańǵyly, 62/ Jibek joly dańǵyly, 85;
19 qarasha - Naýryzbaı aýdany, Naýryzbaı aýdanynyń HQKO, Shuǵyla shaǵyn aýdany, 347/1.
Sondaı-aq, qalanyń Samal 2 shaǵyn aýdany, 111 mekenjaıyndaǵy (Medeý aýdany) «DOSTYK PLAZA» SOO-nyń LED-ekrandarynan da kórsetiletin bolady.
