Almatydaǵy jylý jelisiniń 70 paıyzynyń, al elektr jelisiniń 57 paıyzynyń tozyǵy jetken
ALMATY. Maýsymnyń 11-i. QazAqparat /Erlik Erjanuly/ - Qazirgi tańda energııa tutynýdyń ósýinen búkil álemde adamnyń sharýashylyq qyzmetinde energııa jınaqtaý máselesi aldyńǵy orynǵa shyqty.
Bul jaıly búgin Almatyda ótip jatqan «Energetıka jáne turǵyn úı kommýnaldyq sharýashylyǵyna ınnovatsııalar men energoresýrs saqtaý tehnologııalaryn engizý» dep atalatyn konferentsııada aıtyldy.
«Almatyda jylý jelisiniń 70 paıyzynyń, al elektr jelisiniń 57 paızynyń tozyǵy jetken. Sondyqtan jylý men energııada úlken shyǵyndar bar», deıdi qalalyq energetıka jáne kommýnaldyq sharýashylyq basqarmasynyń bastyǵy Serik Qusaıynov. Onyń sózine qaraǵanda, qazir turǵyn úı kommýnaldyq sharýashylyq salasyna qatysty zańǵa engizilgen jańa ózgerister boıynsha jergilikti atqarý oryndarynyń ókilettigi keńeıdi. Alaıda elektr jınaqtaý men únemdeýde jergilikti atqarý oryndarynyń jumysy jetkiliksiz bolýda. Oǵan turǵyndardyń ózderi de múddeli bolyp, bul sharaǵa belsendi atsalysýy qajet bolyp otyr. 2009 jyldan bastap Almatyda memlekettik mekemelerde elektr shamdaryn qýat únemdeýshi shamdarǵa aýystyrý jumystary atqaryldy. Basqarma tarapynan júrgizilgen taldaýǵa qaraǵanda 2 aıda bilim, mádenıet jánen densaýlyq saqtaý mekemelerinde 5 mıllıon teńgeden astam qarjy únemdelip otyr. Kásporyndarda bul qarajattyń kólemi 3 mıllıon teńgege jýyq boldy.
